चितवन । आफ्नै खर्चमा कसैले अपरिचितलाई कति दिन कतिसम्म खुवाउन सक्ला रु भरतपुरका एकजना पुस्तक व्यवसायीले दुई वर्षदेखि काम गर्न नसक्ने, किनेर पनि खान नसक्ने असक्त, वृद्धवृद्धा र बालबालिकालाई भोको नराखी खुवाइरहेका छन् ।

‘कोही भोका नहून्’ भन्ने अभियान सुरू गरेका व्यवसायी विष्णुप्रसाद पौडेलले दुई वर्षकोे अवधिमा २८ लाख रूपैयाँ बराबरको खाना खाजा खुवाएका छन् । देशका ५४ सहर बजारका ६४ वटा होटलमा उनले पैसा नभएका असक्तहरुलाई खाना खुवाउने व्यवस्था मिलाएका छन् । ‘ती होटलहरुले खाना खाजा खुवाउने गर्छन् । मैले महिनामहिनामा भुक्तानी दिने गरेको छु’ बिहीबार नारायणगढमा भएको कार्यक्रममा पौडेलले भने । चितवन बाहिरका होटलहरुलाई बैंकमार्फत भुक्तानी दिने गरेको उनले बताए । बैंकमार्फत गरेको भुक्तानीको भौचरहरु पनि उनले कार्यक्रममा देखाएका थिए ।

भरतपुर सप्तगण्डकी चोकमा १६ वर्षअघि पुस्तक पसल सुरू गरेका पौडेलले यो कामका लागि पसलको आर्जनबाटै खर्च चलाएको बताए । ‘पहिला कमाएको पनि छ । अहिले कमाएको पनि भोकालाई खुवाउने काममा खर्च गरेको छु । बाहिरको पैसा लिएको छैन । काम गर्दै जाँदा आनन्द आएको छ । गाह्रो लागेको छैन’ पौडेलले भने । दिनमा कुनै बेला ४०० जनाले खाने गरेका उनको भनाइ छ । ‘देवघाटमा अशक्त वृद्धवृद्धाहरु धेरै नै आउँछन् । उनीहरुलाई बोलाएरै खुवाउने गरेको छु । दिनमा बढीमा २० जनासम्म आउँछन् । पौडेलजीले पैसा महिना महिनामा दिँदै आउनु भएको छ । अरुलाई लिनेभन्दा आधा रकम लिने गरेको छु’ पौडेलको अभियानअन्तर्गत देवघाटमा खाजा खाना खुवाउने गरेका मणिराम भुषालले भने ।

आफैँले चलाउन खोजेको अभियान सुरू गरेको भनेर धेरैले पौडेलसँग आधा मूल्यमात्रै लिने गरेका छन् । ‘खान आउनेले ताजा खाजा खाना खान्छन् । भित्रै बसेर खान आग्रह गर्छु । दिनमा १२÷१५ जनाले खाने गरेका छन्’ नारायणगढ पुलचोकमा रहेको होटल मोतीमहलका ऋषिराम सापकोटाले भने । पौडेलले चलाएको अभियान ‘कोही भोको नहुन्’ भन्ने नामले नै आफू मोहित भएको र खाना खाजा खुवाउन तयार भएको सापकोटाले बताए । अब उनको सडकमा अलपत्र परेकाहरुलाई राख्ने आश्रम बनाउने विचार छ । ‘कोही भोको नहुन् भन्ने अभियान म आफ्नै सम्पतिको बलमा जारी राख्न सक्छु भन्ने आँट पलाएको छ । यसका साथै सडकमा धेरै असक्त वृद्धवृद्धा र केटाकेटी देखिन्छ । उनीहरुलाई पनि एउटा राम्रो आश्रम बनाएर राख्ने सोच पलाएको छ’ पौडेलले भने ।

दुई वर्षअघि दसैंका बेलामा तीन दिन केही नखाएको बालक भेटिएपछि आफूलाई यो अभियान चलाउने सोच आएको पौडेलले बताए । ‘दुई वर्षअघि दसैं सकेलगत्तै म पसल खोल्न आउँदै थिएँ । एकजना बालकले दाई तीन दिन भयो, केही खाएको छैन साह्रै भोक लाग्यो भन्यो । दसैंजस्तो पर्वमा पनि बालक भोकै बसेको देखेपछि मेरो मनले यस्तो अभियान चलाउने निधो गरेको हो’ पौडेलले भने । सुरूमा आफ्नै पसल अगाडिको कँडेल चाट हाउसमा उनले यो सुविधा दिएका थिए ।

‘भरतपुरबाट चितवनका अन्य बजारका खाजा पसलमा पनि खाने व्यवस्था मिलाए । खर्च थेग्न गाह्रो भएन । विस्तारै देशका अरु भागमा पनि पुगे । खर्च धानिएकै छ’ पौडेलले भने । उनको परिवारमा आमा, श्रीमती र एक छोरा एक छोरी छन् । सबैले आफ्नो काममा सहयोग र समर्थन गरेको उनले बताए ।