अमेरिका । नेपालले टि-२० क्रिकेट विश्वकपअन्तर्गगत आजको खेलमा ठूलो उलटफेर गर्ने अवसरबाट चुकेको छ । एक रनले नेपाल पराजित भएको छ । यो दुर्भाग्यपूर्ण पराजयसँगै नेपालको विश्वकप यात्रा टुङ्गिएको छ ।

म्याच यस्तो थियो कि हारलाई पत्याउन नेपाली खेलाडीदेखि नेपाली क्रिकेट फ्यानलाई कठिन भएको छ । यस पटक जितेको भए नेपालको क्रिकेट इतिहासमा सबैभन्दा महत्त्वपूर्ण जीत हुने थियो । नेपालले यो हारसँगै इतिहास बनाउनबाट चुकेको छ । टस जितेर पहिले बलिङ रोजेको नेपालले उत्कृष्ट प्रदर्शन गर्दै दक्षिण अफ्रिकालाई ११५ रनमा राकेको थियो । बलिङमा सन्दीप लामिछानेले उत्कृष्ट प्रदर्शन गरेका थिए ।

नेपालले पाएको ११६ को लक्ष्य पूरा गर्ने अवस्था आइसकेको थियो । तर, अन्तिम ओभर निकै उथलपुथलपूर्ण रह्यो । ३ बलमा ४ रन बनाउनुपर्ने अवस्थामा नेपाल पुगेको थियो । त्यसपछि २ बलमा २ रन बनाउनु पर्ने अवस्था आयो । तर, एक रन पूरा गर्न नसक्दा नेपाल हार्न पुग्यो ।

यो हारसँगै नेपालको विश्वकपमा सुपर ८ मा जाने सम्भावना समाप्त भएको छ । अब नेपालले यो चरणको अन्तिम खेल बंगलादेशसँग खेल्ने छ । यो खेलको हार जीतले अर्को चरणमा प्रवेशका लागि केही फरक पर्ने छैन ।

टेक्सस डलासमा निदरल्याण्डसँग हार्नु नै नेपालका लागि दुर्भाग्य थियो । श्रीलंकासँग खेल्न नपाउनु र दक्षिण अफ्रिकासँगको यस्तो हारले भाग्य पनि नेपालको पक्षमा थिएन भन्न सकिन्छ ।

दक्षिण अफ्रिका बलियो टिम हो । यो आफ्नो समूहमा अत्याधिक अंकसहित सुपर ८ मा प्रवेश गरेको छ । आजको खेल हारको भए पनि दक्षिण अफ्रिका अर्को चरणमा प्रवेशका लागि केही फरक पर्ने थिएन । यो जितेसकेको हार नेपालका क्रिकेट फ्यानहरुले सधैँ सम्झिने छन् ।