ड्यालस (अमेरिका) । मंगलबारदेखि सुरु भएको नवाह महायज्ञको छैठौँ दिन आइतबार ७ लाख १९ हजार डलर सहयोगको प्रतिवद्धता आएको छ ।

आइतबार संस्थापक सदस्य, ट्रष्टी, प्याट्रोन, वाल अफ अनर बनेर मन्दिरको निर्माणाधिन परियोजनामा सहयोग गर्न धेरैले चासो देखाएका थिए । तीन वर्ष भित्र तिरिसक्नेगरि ७ लाख १९ हजारको प्रतिवद्धता आएको मध्य चेक, चेक र क्रेडिट कार्ड मार्फत एकलाख ५३ हजार सहयोग प्राप्त भैसकेको जनाइएको छ ।

नौ दिने महापुराणको छैठौ दिनसम्म आइपुग्दा बिभिन्न प्रकारको सदस्यता लिएर २३ लाख सहयोगको प्रतिवद्धता मन्दिरले प्राप्त गरेको छ ।

आइतबार सबैभन्दा बढी एकलाख ५५ हजार ५ सय ५५ डलर सहयोग गर्ने घोषणा कृष्ण पन्त र नागिन पन्त दम्पत्तिले गरेका छन् । यस अघिनै पन्त दम्पत्तिले केही रकम चुक्ता गरिसकेकोमा सदस्यता अपग्रेड गर्दै एकलाख ५५ हजार सहयोग गर्ने घोषणा गरेका हुन् ।

त्यस्तै यमुना भट्टराई र नन्दीकेशर भट्टराई दम्पत्तिले एकलाख ११ हजार सहयोग गर्ने घोषणा गरेका छन् । टेक्ससका अर्का व्यबसायी नरेशराज पाण्डे दम्पत्तिले पनि एकलाख ११ हजार एकसय ११ डलर सहयोगको घोषणा गरेका छन् ।

संस्थापक सदस्य, ट्रष्टी लगायत सबै प्रकारका सदस्यताका लागि एकै पटक सबै रकम चुक्ता गर्नु नपर्ने र तीन वर्षभित्र तिरिसक्नुपर्ने सहुलियत दिएपछि समुदाय र मन्दिरलाई मायाँ गर्ने, चासो दिनेहरु धेरैले सदस्यता लिन इच्छा देखाएका छन् ।

नेपालकै जस्तो आकार–प्रकारको पशुपतिनाथ मन्दिर तथा बौद्ध स्तुपा निर्माण गर्ने उद्वेश्यले महायज्ञ सुरु भएको हो ।

नवाह सुरु भएको पहिलो दिन चारलाख ५० हजार, दोस्रो दिन एकलाख २२ हजार, तेस्रो दिन एकलाख २४ हजार र चौथो दिन दुईलाख ५२ हजारको प्रतिवद्धता भक्तजनहरुले गरेका छन् । नयाँ मन्दिर बनाउन झण्डै ५० लाख डलर लाग्ने अनुमान गरिएको छ ।