ड्यालस (अमेरिका) । ड्यालस फोर्टवर्थ मेट्रोप्लेक्सको युलेसस्थित नेपाली मन्दिरमा हुन लागेको नवाह महायज्ञमा सहभागीहरुका लागि व्यबस्थापन समितिले सकेसम्म सुविस्ता हुनेगरि अघि बढेको जानकारी दिएका छन् ।
नवाहमा सहभागी भक्तजनहरुका लागि बस्ने, भोजन, पार्किङ्गमा कुनै अफ्ठेरो नहोस् भनेर सकेसम्म सजिलो हुनेगरि अघि बढेको जानकारी आइतबार साँझ आयोजित भेटघाट कार्यक्रममा पदाधिकारीहरुले दिएका छन् । नौ दिनसम्म विशेष भीड हुने र सप्ताहन्तका दुई दिन (शनिबार र आइतबार) असाध्यै धेरै सहभागीता रहने अनुमान गरिएको छ ।
हामीले एकै पटकमा एकहजार एकसय सवारी साधन थेग्न सक्नेगरि यथेष्ट पार्किङ्गको प्रवन्ध मिलाएका छौँ । नजिकको पार्किङ्गका लागि फस्ट कम फस्ट सर्भ भएकोले मन्दिर परिसर भन्दा अलिकति टाढा पनि व्यबस्था गरिएको छ’ नेपाली समाज टेक्ससका महासचिव विजय भुसालले भने । मन्दिरको आफ्नै पार्किङ्गलटका अतिरिक्त नजिकै रहेको रिह्याभ सेन्टर पछाडीको पार्किङ्गलट पनि प्रयोग गर्न सकिन्छ । मन्दिर आफ्नै र रिह्याभ सेन्टरको गरि चारसय पार्किङ्ग क्षमता रहेको छ ।
तर त्यतिले मात्र नधान्ने भएकोले बेडफोर्ड सिटीसँग समन्वय गरेर पेनिङ्गटन फिल्डलाई पनि नवाह अवधिभरि प्रयोग गर्न पाइने व्यबस्था भएको पत्रकार भेटघाट कार्यक्रममा जानकारी दिइयो ।
पेनिङ्गटन फिल्डमा मात्र एकै पटकमा सातसय गाडी पार्किङ्ग गर्न सकिन्छ । त्यहाँबाट मन्दिरको दुरी दुई माइल मात्र छ । त्यहाँबाट हरेक १५ मिनेटमा मन्दिरमा आउने र जाने गरि निशुल्क शटल बसको व्यबस्था समेत गरिएको छ । जसले गर्दा सहभागीहरुले सवारी साधन पार्किङ्गको कुनै चिन्ता गर्नु नपर्ने बताइएको छ ।
सप्ताहन्तका दिन (शनिबार र आइतबार) हरेक दैनिक दुई वटा शटल बस र सोमबारदेखि शुक्रबारसम्म एउटा शटल बसले हरेक १५ मिनेटमा पेनिङ्गटन फिल्डबाट भक्तजनहरुलाई लैजाने र ल्याउने काम गर्ने जनाइएको छ ।
कार्यक्रममा नेपाली सांस्कृतिक तथा आध्यात्मिक केन्द्रकी अध्यक्ष सीता सापकोटाले नवाह अवधिभरि आउँदा आफ्ना छोराछोरीलाई समेत सँगै ल्याएर आफ्नो धर्म संस्कार, संस्कृतिका बारेमा जानकारी दिने अवसर नछुटाउन अनुरोध गरिन् । ‘तपाईहरुले पार्किङ्गको कुनै तनाव लिनु पर्दैन, आफ्ना अभिभावकहरु पनि हुनुहुन्छ भने बिहानै ल्याएर दिनभरिका लागि मज्जाले कथा श्रवण लगायत अन्य गतिविधिका लागि छोडेर जान सक्नुहुनेछ’ सापकोटाले भनिन् ।
नवाह महायज्ञको निम्ता सबैको घर, अपार्टमेन्टमा पु¥याउन प्रयास गरिएको भएपनि एकीन तथ्यांक नहुँदा घरघरमा पुग्न नसकिएको मन्दिरले जनाएको छ । ‘हामी सबैको घरमा बक्स सहितको निम्तापत्र पुर्याउने प्रयास गयौँ, तर धेरै प्रयास गर्दा पनि सकिएन । तसर्थ निम्तोबक्स प्राप्त नभएपनि यो नवाह सबैका लागि खुल्ला, सबै जना सहभागी हुन मिल्ने, हुनुपर्ने धार्मिक कार्य भएकोले सबैजना आइदिनुहोला । मलाई त निम्तो आएको छैन भनेर कृपया अप्ठेरो नमान्नुहोला’ अध्यक्ष सापकोटाले भनिन् ।
नवाहको नियमित जानकारी र अपडेटका लागि मन्दिरको सामाजीक सञ्जाल (फेसबुक, इन्स्टाग्राम, टिकटक) लाई फलो गर्न समेत मन्दिर व्यबस्थापन समितिले अनुरोध गरेको छ ।
कार्यक्रममा मन्दिरका पुर्ब अध्यक्ष सुरेशचन्द्र पोखरेलले नवाह महायज्ञको तयारी र हालसम्मका प्रगतिका बारेमा जानकारी दिएका थिए । त्यस अवसरमा मन्दिरका उपाध्यक्ष छबीमणि चापागाई, स्वयमसेवक परिचालन समितिका जीवन घिमिरे, मन्दिका सचिव दिनेश ज्ञवाली लगायतले नौ दिनसम्म नवाहलाई व्यबस्थित रुपमा अघि बढाउन गरिएका हालसम्मका तयारीका बारेमा जानकारुी दिएका थिए ।
कार्यक्रममा दिइएको जानकारी अनुसार मन्दिर रहेको युलेस सिटीले सहभागीको संख्या माग गरेको हुँदा सबैजनाले इन्ट्री प्वाइन्टबाट मन्दिर प्रवेशको समयमा आफ्नो नाम दर्ता गर्नुपर्नेछ । ‘यो विवरण गोप्य र अन्यत्र कतै प्रयोगमा जानेछैन, सिटीले कति सहभागी हुन्छन् भनेर जानकारी मागेको हुँदा हामीले गर्नैपर्ने अवस्था छ’ पूर्ब अध्यक्ष पोखरेलले भने ।
मंगलबारदेखि नवाहको पहिलो दिन बिहान साढे नौ बजे भव्य कलशयात्रा हुनेछ । कलशयात्रामा ड्यालस फोर्टवर्थका हरेक घरबाट सहभागिताका निम्ति मन्दिरले आव्हान गरेको छ ।
नौ दिनसम्म हुने महायज्ञमा पण्डित दीनबन्धु पोखरेलले कथा वाचन गर्नेछन् । युलेसमा पशुपतिनाथ र बौद्ध स्तुपाको बाँकी कार्य अघि बढाउनका लागि आर्थिक सहयोग जुटाउने उद्वेश्यले नवाह गर्न लागिएको हो ।
प्रतिक्रिया