ड्यालस (अमेरिका) । मंगलबारदेखि सुरु भएको नवाह महायज्ञको चौथो दिन शुक्रबारसम्म झण्डै १० लाख डलर सहयोगको प्रतिवद्धता मन्दिरले प्राप्त गरेको छ ।

नेपालकै जस्तो आकार–प्रकारको पशुपतिनाथ मन्दिर तथा बौद्ध स्तुपा निर्माण गर्ने उद्वेश्यले महायज्ञ सुरु भएको हो । नवाह सुरु भएको पहिलो दिन चारलाख ५० हजार, दोस्रो दिन एकलाख २२ हजार, तेस्रो दिन एकलाख २४ हजार र चौथो दिन दुईलाख ५२ हजारको प्रतिवद्धता भक्तजनहरुले गरेका छन् । नयाँ मन्दिर बनाउन झण्डै ५० लाख डलर लाग्ने अनुमान गरिएको छ ।

नवाहको क्रममा शुक्रबारसम्म एकलाख २९ हजार नगदनै सहयोग संकलन भैसकेको छ ।

भक्तजनहरुको मुख्य सहभागिता शनिबार र आइतबार हुने अनुमान गरिएको छ । त्यसका लागि मन्दिरले प्रयाप्त पार्किङको व्यबस्था मिलाएको पार्किङ् व्यवस्था समितिका संयोजक बलराम पौडेलले जानकारी दिए । बेडफोर्डमा पार्किङ् गरेर मन्दिरमा आउँदा निशुल्क सटल बसको व्यबस्था गरिएको छ ।

नेपालीहरुले गौरव गर्ने डिजाइन, सामुदायिक केन्द्र सहितको सुविधा रहने मन्दिर निर्माणका लागि सबैसँग आव्हान गरिएको छ । ‘ड्यालस फोर्टवर्थका हरेक परिवार संस्थापक सदस्य मात्र बनिदिने हो भने हामीले चाहेको मन्दिर, स्तुपा बन्नेछ । त्यसको लागि सबैले एक पटक मुठ्ठी खुल्ला गरेर सहयोग गरिदिनका लागि हाम्रो विनम्र अनुरोध छ’ मन्दिर बोर्ड अफ ट्रष्टीका उपाध्यक्ष डा. प्रेम अधिकारीले भने ।

‘मन्दिर हाम्रो लागि हो, हाम्रा बालबच्चाहरुको लागि हो, अमेरिकामा भविष्यसम्म हाम्रो धर्म संस्कार जीवित राख्नका लागि हो’ डा. अधिकारीले भने ।

मन्दिर र स्तुपाको लागि अहिलेसम्म कुनै पनि सरकारी, एनजिओको सहयोग प्राप्त भएको छैन । नेपाली समुदायकै सदस्यहरुले आफ्नो पसिनाबाट आर्जित रकम सहयोग गरेका कारण अहिलेको स्वरुपमा मन्दिर आइपुगेको हो । तर नेपाली समुदाय ड्यालस फोर्टवर्थ मेट्रोप्लेक्समा बढेसँगै गत वर्ष निर्माण सम्पन्न भएको भवन साँघुरो महसुस भएको छ ।

पशुपतिनाथ मन्दिर तथा बौद्ध स्तुपाको अलग अलग संरचना निर्माणपछि अहिलेको मन्दिर भएको भवन पुरै सामुदायिक केन्द्रमा रुपान्तरण हुनेछ । त्यसले गर्दा स्कुल, सामुदायिक गतिविधि, स्वास्थ क्लिनिक सञ्चालनमा सहजता थपिने विश्वास मन्दिरका पदाधिकारीहरुको छ ।

‘केही व्यक्तिहरुको मात्र प्रयासबाट यति ठूलो अभियान पुरा हुँदैन । यो अभियानका लागि हरेक घर, हरेक परिवारबाट सहयोगको अपेक्षा गरिएको छ । मन्दिर र स्तुपाको अभियानमा सबैबाट एक एक इट्टा थपिने हो भने हाम्रो सपना छिट्टै पुरा हुनेछ’ मन्दिरका पूर्ब अध्यक्ष सुरेशचन्द्र पोखरेलले भने ।

नवाहको क्रममा हरेक दिन कथा वाचन, विशेष झाँकी प्रदर्शन भैरहेका छन् । झाँकी प्रति सर्वसाधारणको निकैनै अभिरुची देखिएको छ ।

किस्ताबन्दीमा तिर्न सकिनेः
नवाह अवधिभरि संस्थापक सदस्य, ट्रष्टी, प्याट्रोन, वाल अफ अनर बन्नेलाई सजिलो हुनेगरि व्यबस्था गरिएको छ । एकै पटक आर्थिक भार नपरोस् भनेर किस्तावन्दीमा सदस्य बन्ने, सहयोग गर्न सकिने सुविधा दिइएको छ ।

‘अहिले ५०० डलर सहयोग गरेर सदस्यताको बाँकी रकम विस्तारै तिर्दै जान सक्नुहुनेछ । सबैलाई समेट्ने, रहर गर्ने सबैलाई अवसर दिने, आर्थिक भार एकैपटक नपरोस् भनेर यो सुरुवात गरिएको हो’ मन्दिर कार्यसमितिका उपाध्यक्ष छबीमणि चापागाईले भने ।

मन्दिरमा संस्थापक सदस्य बन्न चाहनेले तीनहजार ५ सय, अनरेबल संस्थापक सदस्यले ५ हजार, ट्रष्टीले ११ हजार, अनरेबल ट्रष्टीले १५ हजार, प्याट्रोनले ३५ हजार, फेमिली प्याट्रोनले ५० हजार र वाल अफ अनर बन्नका लागि एकलाख डलर सहयोग गर्नुपर्ने व्यबस्था छ ।

मन्दिरलाई सहयोग गर्ने दाताहरुको नाम मन्दिरको भित्तामा लेखिनेछ ।