किभ । रुसद्वारा युक्रेनको क्रेमेन्चुक सहरस्थित एकहजार मानिस रहेको व्यस्त सपिङ सेन्टरमा क्षेप्यास्त्र प्रहार गर्दा कम्तीमा १६ जना गैरसैनिकको मृत्यु भएको छ ।
स्थानीय समयअनुसार सोमबार ४ बजेको समयमा आक्रमण भएको थियो । घटना हुँदा त्यस व्यस्त सेन्टरभित्र लगभग एकहजार जना मानिस रहेको अनुमान गरिएको युक्रेनी राष्ट्रपति भोलोदिमिर जेलेन्स्कीले बताए ।
जर्मनीमा आयोजित एक सम्मेलनमा रहेका विश्वका सात धनी राष्ट्रहरूको समूह ‘जी सेभेन’का नेताहरूले रुसी आक्रमणलाई ‘घृणित कार्य’को संज्ञा दिँदै त्यसको निन्दा गरेका छन् ।
‘निर्दोष नागरिकहरूमाथि विवेकहीन ढङ्गमा गरिने आक्रमणहरू युद्ध अपराध हुन्’, उनीहरूले संयुक्त रूपमा जारी गरेको विज्ञप्तिमा भनेका छन् । आक्रमणमा परी कम्तीमा ५९ जना घाइते भएका छन् भने मृत्यु हुनेको संख्या अझै बढ्न सक्ने अनुमान गरिएको छ । यस आक्रमणमा रुसलाई दोषी ठहर गरिएको छ ।
अनलाइनमा सार्वजनिक तस्बिरहरूले उक्त सेन्टरको भवनमा आगो दन्किरहेको र त्यहाँबाट बाक्लो कालो धुवाँ आकाशतर्फ उडिरहेको देखाउँछन् । ‘यो एक मानवताविरुद्धको अपराध हो । यो स्पष्टरूपमा गैरसैनिक मानिसहरूविरुद्धको आतंक र निन्दनीय कार्य हो’, स्थानीय गभर्नर दिमिट्रो लुनिनले टेलिग्राममा लेखेका छन् ।
त्यहाँ नभेटिएका मानिसहरूको परिवार सम्भावित खबरको पर्खाइमा बसेका छन् । रातभर खोजी कार्य जारी राख्न घटनास्थलमा बत्ती र जेनेरेटरहरू ल्याइएको रोयटर्स समाचारसंस्थाले जनाएको छ । मध्यपूर्वी सहर क्रेमेन्चुक रुसी नियन्त्रण क्षेत्रबाट करिब १३० किलोमिटर टाढा रहेको छ ।
राष्ट्रपति जेलेन्स्कीले उक्त मलको रुसका निम्ति कुनै रणनीतिक अर्थ नभएको र त्यसलाई कब्जा गर्ने सेनाहरूलाई कुनै जोखिम नभएको बताए । ‘त्यहाँ मानिसहरूको सामान्य जीवन बिताउने प्रयास मात्र गरेका हुन् जसले नियन्त्रकहरूलाई क्रोधित बनाउँछ’, उनले भने ।
यस आक्रमणलाई ‘युरोपेली इतिहासमा सबैभन्दा निर्लज्ज आतंकवादी कार्य’को रूपमा व्याख्या गरे । मसँग अहिले बोल्नका निम्ति शब्दहरू छैनन् । मेरो सहरमा यस्तो घटना हुन सक्छ भन्ने मैले कल्पना गरेको थिइनँ’, उनले भने ।
जी सेभेन समूहले अन्य विषयसँगै रुसमाथिको प्रतिबन्धमा कडाइ गर्ने विषयमा छलफल गर्न भेला भएलगत्तै आक्रमण भएको हो । घटनापछि यस समूहले युक्रेनलाई निरन्तर आर्थिक, मानवीय र सैन्य सहयोग उपलब्ध गराउने जनाएका छन् ।
क्रेमलिनले यसबारे हालसम्म कुनै प्रतिक्रिया जनाएको छैन । यद्यपि, गैरसैनिकमाथि प्रहार गर्नु आफ्नो उद्देश्य नभएको बताउँदै आएको छ । रोयटर्स/बिबिसी
प्रतिक्रिया