मातृभूमि नेपालमा सङ्घीय लोकतान्त्रिक गणतन्त्रात्मक संविधान निर्माण गरी जनताको हक,अधिकारलाई सुरक्षित गर्ने प्रयास जारी रहेको बेला सोमबार कैलाली,गौर लगायत विभिन्न स्थानमा भएको घटनाबाट हामी स्तब्ध भएका छौँ । शदियौंदेखि एकापसमा सामाजिक रूपमा अत्यन्त सद्भाव र आपसी सहिष्णुता अवलम्बन गरेर देश विदेशमा छरिएर बसेका हामी नेपालीहरू मुलुकका विभिन्न भागमा भएको हिंसाको घटनाले निकै मर्माहत भएका छौँ . देश र जनताको सुरक्षाका लागि अहोरात्र खट्ने नेपाल प्रहरी, सशस्त्र प्रहरी र अन्य सुरक्षाकर्मी माथि कैलालीमा जे जस्तो आक्रमण गरी उहाँहरूको हत्या गरियो,त्यो आधुनिक सभ्य समाजको कलंक हो अनि मानवता विरोधी आततायी कार्य हो ।
म मेरो व्यक्तिगत र अमेरिकामा रहेका लोकतन्त्र पक्षधर सबै नेपालीहरूको साझा सङ्गठन नेपाली जन सम्पर्क समिति अमेरिकाको तर्फबाट अत्यन्त क्रुर,आततायी र निर्दयी प्रवृत्तिको कैलाली,गौर लगायत विभिन्न स्थानमा भएको घटनाको घोर निन्दा र भर्त्सना गर्दछु । आफ्नो जिम्मेवारी बहन गर्ने क्रममा आततायीहरुको क्रुर आक्रमणमा परी मारिएका ती वीर एवं साहसिक सुरक्षाकर्मीहरुको योगदानको उच्च सह्राहना गर्दै दिवङ्गत आत्माको चीर शान्तिको कामनासहित हार्दिक श्रद्धान्जली अर्पण गर्दछु । साथै वीर सुरक्षाकर्मीका समस्त शोक सन्तप्त परिवारजनप्रति गहिरो समवेदना व्यक्त गर्दछु । देश र जनताका लागि खटेका ती वीर पराक्रमी सुरक्षाकर्मीहरुलाई जिउँदै जलाउनु भनेको आतङ्कवादी कार्य हो, मानवता विरोधी जघन्य अपराधको पराकाष्ठा हो ।
यो निन्दनीय घटनाको बेला आपसी सद्भाव खलल हुन नदिन मुलुकका सबै राजनीतिक दल एवं नागरिक समाजलाई एकतावद्ध भएर सद्भाव कायम गर्ने र मुलुकव्यापी रूपमा शान्ति-याली लगायतका कार्यक्रम आयोजना गरी आपसी एकता अझ मजबुत बनाउन पहल गर्न हामी हार्दिक अपिल गर्दछौँ ।
नेपाल सबै जातजाति, भाषाभाषी, धर्म,सम्प्रदायको साझा बगैंचा हो । यो सुन्दर बगैंचालाई गोडमेल गरेर सौन्दर्य सुवास छर्न हामी नै अग्रसर हुनुपर्छ । त्यसैले यो कालो घटनालाई अझ अराजक हुन नदिन तत्काल पहल गरौँ र सामाजिक सद्भाव र एकता अक्षुण राख्न हातेमालो गरौँ ।
संविधान निर्माणको सम्मुख सुरक्षाकर्मीमाथि जे जस्तो कायरतापूर्ण बर्बर हत्या र आक्रमण भएको छ यसले प्रतिगामीहरुलाई बल नपुगोस् र देश गृहयुद्धको चपेटामा नफसोस् भन्नेतर्फ सबैको ध्यान जानु जरुरी छ । समाजमा सद्भाव, भाइचारा र मेलमिलाप कायम गर्न एकजुट होऔं । आवेश, उत्तेजना र आक्रोश त्यागौं । भातृत्व र सामाजिक एवंम धार्मिक सद्भाव कायम गरौँ । साम्प्रदायिक हिंसा होइन, संयम र धैर्यका साथ अघि बढौं ।
जय नेपाल ।
आनन्द विष्ट
सभापति एवं
नेपाली जन सम्पर्क समिति,अमेरिका परिवार
प्रतिक्रिया