काठमाडौँ । गैरआवासीय नेपाली संघ (एनआरएनए)को नयाँ नेतृत्वको लागि मतदान सुरु भएको छ । 

 

निर्वाचन समितिले साँझ ५ बजेदेखि १० बजेसम्म मतदान गर्न तालिका सार्वजनिक गरेको गरेको थियो । तर, केही समय विवाद भएपछि ढिलोगरी मतदान सुरु भएको हो । 

 

ढिलागरी विद्युतीय मतदान सुरु भएकाले आजै परिणाम सार्वजनिक हुने संभावना भने ज्यादै कम देखिएको छ । मतदाताले मतदान गरिसकेपछि बिहीबार बिहानसम्म नतिजा सार्वजनिक हुने अनुमान गरिएको छ । 

 

मत दिनका लागि कुनै एउटा परिचयपत्र चाहिने बताइएको छ । विवाद आएमा परिचयपत्र आवश्यक पर्छ । ड्राइभिङ लाइसेन्स, पासपोर्ट वा कुनै एउटा परिचयपत्र भए पुने एनआरएन महासचिव डा बद्री केसीले बताए । 

 

ड्राइभिङ लाइसेन्स, पासपोर्ट नभए पनि पुग्छ । कतै मतदातामाथि दाबी विरोध परे आईडी चाहिन्छ । निर्वाचनमा विभिन्न देशबाट २६ सय ६५ ले मतदान गर्दैछन् ।  काठमाडौँमा जारी सम्मेलन विदेशमा बस्ने नेपालीका मुद्दामा कम र चुनावी चहलपहलमा बढी केन्द्रित भएको छ । 

 

आज साँझ नयाँ नेतृत्वका लागि मतदान सुरु भएको छ । अध्यक्ष पदमा दुई जना कुमार पन्त र कुल आचार्य आआफ्ना प्यानलसहित चुनावी प्रतिस्पर्धामा छन् । निर्वाचनको माहोल दुवैको राम्रो भएकाले नतिजा कसको पक्षमा आउँछ भन्ने अनुमान गर्न कठिन भएको छ । 

दुवै वर्तमान कार्यसमितिमा उपाध्यक्ष हुन् । 

 

चुनावमा चर्को प्रतिस्पर्धा चलेको छ । पन्तलाई सत्तारुढ पार्टी नेकपा निकटका रुपमा र आचार्यलाई प्रजातान्त्रिक विचारधारा अर्थात् कांग्रेस निकटका रुपमा प्रचार गरिएको छ । तर, दुवै उम्मेदवारका लागि स्वतन्त्र मतदाताको पनि उत्तिकै समर्थन रहेकाले जीत कसको पोल्टामा पर्छ भन्ने यकिन छैन । एनआरएनका विभिन्न ४२ पदमा निर्वाचन हुँदैछ ।