हिमालय खबर संबाददाता
ड्यालस (टेक्सस)– गैर आवासीय नेपाली संघ (एनआरएन) अमेरिकाको कार्यसमिति सदस्य (बोर्ड अफ डाइरेक्टर) मा टेक्ससका समाजसेवी कृष्ण लामिछानेले उम्मेदवारी घोषणा गरेका छन् ।
शुक्रबार सामाजीक सञ्जाल मार्फत लामिछानेले उम्मेदवारी घोषणा गरेका हुन् । लामिछाने नेपाली समाज टेक्ससका वहालवाला अध्यक्ष पनि हुन् । उनले शनिबार आधिकारिक रुपमा उम्मेदवारीको मनोनयनपत्र दर्ता गर्ने उल्लेख गरे ।
आफुले नेपाली समाज टेक्ससको अध्यक्ष रहेर सामाजीक कामहरु धेरै गरेको र एनआरएनमा गएर यो संस्थालाई परोपकारी संस्थाका रुपमा अघि बढाउन चाहेको उनले बताए । ‘मेरो उम्मेदवारी समुदायका सदस्यका लागि मर्दा र पर्दाका लागि हो,’ लामिछानेले भने ।
एनआरएन मार्फत नेपाली समुदायका लागि धेरै कामहरु गर्न सकिन्छ, त्यहाँ गएर आफु सामुदायीक हितका कामहरु गर्न चाहने उनले भने ।
एनआरएनको वर्तमान कार्यसमितिले सामुदायिक हितका लागि खासै काम गर्न नसकेको हुँदा आफुले अघि बढेको समेत लामिछानेले बताए ।
उम्मेदवारीसँगै आफुले नेपाली समाज टेक्ससको अध्यक्षबाट राजिनामा गर्ने नगर्ने बारेमा केही नसोचेको उनले बताए । तर, उम्मेदवारको अन्तिम नामावली प्रकाशित भएपछि आफुले नेपाली समाज टेक्ससको ‘कार्यवाहक अध्यक्ष’ पद हस्तान्तरण गर्ने बताए ।
लामिछानेका अतिरिक्त टेक्ससबाट एनआरएनको बोर्ड अफ डाइरेक्टरमा एनआरएन टेक्सस च्याप्टरका अध्यक्ष उत्तम लामिछानेले पनि उम्मेदवारी घोषणा गरेका छन् ।
प्रतिक्रिया