हिमालयखवर संवाददाता-
टेनिसी (अमेरिका)– गैर आवासीय नेपाली संघ (एनआरएन) अमेरिकाको वर्तमान टीम बिरुद्ध टेनिसी राज्यको अदालतमा परेको एउटा मुद्धामा अदालतले संघको पक्षमा फैँसला गरेको छ ।
दुई वर्ष अघिको निर्वाचनमा वर्तमान अध्यक्ष डा. केशव पौडेल विरुद्धको निकटम प्रतिद्वन्दी नगेन्द्र पौडेलले दर्ता गरेको मुद्धामा अदालतले संघको पक्षमा निर्णय सुनाएको हो । अघिल्लो निर्वाचनमा फर्जी सदस्य बनाएर भोट हालेको, एउटै आइपीबाट सयौ भोट हालिएको विषयमा परेको उक्त मुद्धाको फैँसला मंगलबार अदालतले सुनाएको हो ।
‘हाम्रो पक्षमा फैँसला आएको छ, यो फैँसलाले अनावश्यक रुपमा मुद्धा मामिला गरेर संस्थालाई बदनाम गर्ने प्रतिगामी तत्वहरु कमजोर भएका छन्,’ टेनिसी पुगेका एनआरएन अमेरिकाका अध्यक्ष डा. पौडेलले हिमालय खबरसँग भने । अदालतको फैँसलापछि उत्साहित भएका पौडेलले मुद्धामामिला गर्नेहरु समाजका भाँड भएको उल्लेख गर्दै तिनलाई बहिष्कार गर्नुपर्ने बताए ।
वर्तमान कार्यसमितिलाई यो मुद्धा ठूलो टाउको दुखाईको विषय थियो । मुद्धा हाल्ने पक्षले क्षतीपूर्ति समेत दावी गरेकोले उक्त रकम तिर्नुपर्ने पक्षमा अदालतको फैँसला भएको भए संस्थालाई ठूलो आर्थिक भार समेत पर्ने अवस्था थियो ।
उता फैसलापछि एनआरएन अमेरिकाका उपाध्यक्ष राम सी पोखरेलले पनि खुशी व्यक्त गरे । ‘एनआरएन अमेरिकामा रहने सबै नेपालीको साझा संस्था हो, मुद्धा मामिला गरेर समय खेर फाल्ने भन्दा अब नेपाली समाजको वृहत्तर हितका लागि हामी अघि बढ्न जरुरी छ,’ पोखरेलले भने । उनले समस्याको समाधान सुरुमा आफ्नै समाजभित्र खोज्नुपर्नेमा जोड दिएका छन् ।
यो मुद्धाको फैसलापछि एनआरएन अमेरिका पूर्ण रुपमा चुनाव केन्द्रित भएको छ । ‘समयमै चुनाव हुन्छ, अदालतको फैँसलापछि म चुनावमै बढ्ता लाग्छु,’ डा. पौडेलले भने ।
उनका अनुसार एनआरएनको सदस्यता भेरिफिकेसनको काम अघि बढाइने र नोक्सान भएको १० दिन थपिने संभावना छ । ‘जुडिसियल कमिटीको निर्देशनका कारण भेरिफिकेसन समितिले काम गर्न नपाएको १० दिन थपेर चुनावको मिति तोक्ने तयारीमा हामी छौँ,’ उनले भने ।
मार्च १९ देखि ६० दिनभित्र चुनाव भैसक्नुपर्ने विधानतः व्यबस्था छ । भेरिफिकेसन समितिले काम गर्न नपाएको भन्दै १५/२० दिन पछि चुनाव गराउने मनस्थितीमा डा. पौडेल छन् ।
प्रतिक्रिया