टेक्सस(अमेरिका)- एनआरएन अमेरिका अध्यक्ष पदमा उम्मेदवारी घोषणा गरेका गौरीराज जोशीले अाफूले कसैसँग पनि कुनै सहमति नगरेकाे जनाएका छन् ।
मंगलवार राति विज्ञप्ति जारी गर्दै जोशीले कुनै सहमति नगरेको र बिभिन्न सञ्चारमाध्यम र सामाजीक सञ्जालहरूमा अाएका कुराहरू हल्लामात्र भएकाे स्पष्ट पारेका छन्र । अध्यक्ष पदको योग्यताका बारेमा विभिन्न सञ्चार माध्यममा आएका प्रतिकृयाहरु प्रति आफ्नो ध्यानाकर्षण भएको जनाउदै जोशीले यस विषयमा कानुनविद्, एनअारएनका पूर्व पदाधिकारीहरुसँग परामर्श गरिरहेको बताए ।
गैर आवासीय नेपाली संघ अमेरिकाका क्षेत्रीय संयोजक सोनाम लामा र उपक्षेत्रिय संयोजक ए सी शेर्पाले सोमबार राति उम्मेदवार बन्न चाहिने योग्यताका बारेमा भन्दै अँध्यारो कुनामा बसेर विज्ञप्ती प्रकाशित गरेका थिए । यो विज्ञप्ति जोशीलाइ उम्मेदवार हुन नदिने प्रति लक्षित थियो । विज्ञप्ती वर्तमान अध्यक्ष तथा पुनः उम्मेदवारी घोषणा गरेका डा. केशव पाैडेललाइ सहयोग र समर्थन गर्ने नियतले प्रेरित थियो ।
यो विज्ञप्ति पछि जोशी समर्थक तथा अमेरिकामा रहेका सर्वसाधारण नेपालीहरूले पनि तिखो प्रतिकृयाहरु जनाएका छन् ।
मंगलवार ड्यालसमा जोशीसँग सोनाम लामा, ए सी शेर्पा लगायतको अनौपचारिक छलफल भएको थियो । जोशीलाइ उम्मेदवारी नदिन र दिएमा अनेकन मुद्धा मामिला लगाएर काम गर्नै नदिने धम्की बिभिन्न व्यक्तिहरूले दिएका थिए । तर जोशीले अाफू कानुनी रूपमा अघि बढ्ने र युवाहरू अाफ्नाे साथमा रहेकाे प्रष्टाएका थिए ।
त्यो बैठकमा जन सम्पर्क समिति सम्बद्ध विष्णु सुवेदी, प्रमोद सिटौला समेत सहभागी थिए । उनीहरू समेत जोशीलाइ उम्मेदवारी नदिन दवाव दिदै अाएका छन् । सिटाैला एनअारएनको सदस्यता भेरिफिकेसन समितिका सदस्य समेत हुन् ।
अनाैपचारिक बैठकमा टेक्ससका अगुवा सामाजिक व्यक्तिहरु पनि थिए । यो अनौपचारिक छलफल पछि जोशीले उम्मेदवारी फिर्ता लिएको र पाैडेललाइ सघाएकाे भन्ने हल्लाहरू बाहिर ल्याइएको थियो । जुन हल्लालाइ जोशीले विज्ञप्ति मार्फत कडा रूपमा खण्डन गर्दै अापत्तिमात्र जनाएका छैनन अाफ्नाे उम्मेदवारी कायमै रहेको र अाफूलाइ साथ दिने नेपाली समुदायको साथ लिएर अमेरिकाभरि पुग्ने बताएका छन् ।
जोशीद्वारा जारी प्रेस विज्ञप्ति
एनआरएन अमेरिकाको आगामी कार्यकालका लागि अध्यक्ष पदमा मैले उम्मेदवारी घोषणा गरेको यहाँहरु सबै जानकारनै हुनुहुन्छ । एनआरएन अमेरिकामा केही नयाँ काम गरेर अघि बढ्न सकिन्छ भन्ने उद्देश्यले मैले उम्मेदवारी घोषणा गरेको हुँ ।
उहाँहरूले दिनु भएको उत्साह र हौसलाले मलाई समुदायको हितका लागि काम गर्न अझ प्रेरणा मिलेको छ । विशेष गरी युवा जमातले मलाई अझ सक्रिय हुन प्रेरणा दिईरहनु भएको छ । एनआरएन अमेरिकालाई अझ सशक्त बनाउन सदस्यता विस्तार गर्नु पर्छ भनेर म यस अभियानमा सक्रिय भएँ । टेक्ससमा मात्र होइन अन्य राज्यहरूमा पनि सदस्यता विस्तारमा लागिपरेँ । सदस्यताका लागि अघिल्लो पटक भन्दा ५० प्रतिशत बढी आवेदन परेको छ । यो खुसीको कुरा हो ।
यसैबिच गैर आवासीय नेपाली संघ (एनआरएनए)का क्षेत्रीय संयोजक र उपक्षेत्रिय संयोजकज्यूले संयुक्त रूपमा जारी गर्नु भएको एनआरएन एनसीसी अमेरिकाको अध्यक्ष उम्मेदवार बन्न चाहिने योग्यता बारे उल्लिखित विज्ञप्ति, यस पछि विभिन्न समाजिक सञ्जाल र समाचार प्रति मेरो ध्यानाकर्षण भएको छ ।
यसमा धेरै शुभचिन्तकहरुले यो नियतवश एक पक्षलाई उम्मेदवार बन्न वन्देज लगाउने गलत आशयले यसरी विज्ञप्ति आएको भन्दै आक्रोस पनि व्यक्त गर्नु भएको छ । टेक्सस ड्यालसमा जनवरी दोस्रो साता भएको एनआरएन अमेरिकाको पाँचौ वार्षिक साधारण सभाको निर्णय, एनआरएन अमेरिकाको इतिहास, संस्था दर्ता र प्रयोग भएको कर नम्बर समेतका प्रमाणलाई पनि विज्ञप्तिले चुनौती दिएको समाजिक सञ्जाल र मेरा शुभचिन्तकहरुवाट अभिव्यक्तिहरू आए ।
एनआरएन अमेरिकाले गठन गरेको निर्वाचन समितिको कार्यक्रम अनुसार उम्मेदवारी दर्ता गरेपछि, योग्यताको प्रश्न उठाउदै दाबी विरोध गर्न पाउने प्रक्रियामा जान बाँकी नै छ ।
टेक्ससमा एनआरएनए क्षेत्रीय संयोजक सोनाम लामा, उपक्षेत्रिय संयोजक ए सी शेर्पा ज्युहरु लगायत विभिन्न संघ संस्थासँग आबद्ध साथीहरूसँग मंगलवार एनआरएन अमेरिकाको आगामी नेतृत्वका बारे अनौपचारिक छलफल भएको हो ।
त्यस बेला विधानको व्यवस्था र मेरो उम्मेदवारीवारे पनि सामान्य चर्चा भएका थिए । तर, कुनै सहमति नभएको म यसै विज्ञप्ति मार्फत यहाँहरु सबैलाई जानकारी गराउन चाहन्छु । विधानका विषयमा जुन बहस उठेको छ यसबारेमा मैले कानुन विज्ञ, एनआरएन अमेरिकाका पदाधिकारीहरू, पूर्व पदाधिकारीहरुसँग सल्लाह लिइरहेको छु ।
मैले उम्मेदवारी फिर्ता लिएको, सहमति गरेको जस्ता समाचारहरु आएका छन् यसमा कुनै सत्यता नभएको पनि म यसै विज्ञप्ति द्धारा जानकारी दिन चाहन्छु । एनआरएन अमेरिका नेपाली समुदायलाई जोड्ने एउटा अभियान हो ।
अमेरिका बस्ने नेपालीका लागि पनि एनआरएन अमेरिकाको आगामी नेतृत्वले काम गर्नु पर्छ भन्ने मेरो मान्यता हो । विभिन्नका ७४ देशमा फैलिएको यो एनआरएनको पहलले नै संविधानमा गैर आवासीय नागरिकताको व्यवस्था भएको हो । अमेरिका सबैभन्दा बढी एनआरएन सदस्य रहेको देश पनि हो । यो संस्थाको आफ्नै विशिष्ठ गरिमा छ । यो संस्थाको हितमा आँच आउने कुनै पनि कार्यले हामी विदेशमा बस्ने पेशा गर्ने नेपालीलाई नै हानी गर्छ । संस्थाको गरिमा घटाउने कार्य हुँदा हामीनै कमजोर हुन्छौं ।
नेतृत्वका लागि छलफल हुन सामान्य प्रक्रिया हो । म सबैलाई अहिले भइरहेको गतिविधिलाई पनि यसै अनुसार सकरात्मक रूपमा लिन आग्रह गर्छु । पुनः अध्यक्षमा मेरो उम्मेदवार कायमै रहेको पुन प्रष्ट गर्न चाहन्छु ।
गौरी जोशी
अध्यक्ष उम्मेदवार
ड्यालस टेक्सस
प्रतिकृया दिनुहोस:
प्रतिक्रिया