युलेस, (टेक्सस) – युलेसको होलीलाई रमाईलो तुल्याउने पात्रहरु धेरै छन् । हुनतः फागु घँस्ने अर्थात दल्ने काममा रमाइलो के नै हुन्छ र ? भन्ने जिज्ञासा पनि जाग्न सक्छ । तर विगत ७ वर्षदेखि टेक्ससको युलेस सिटीका नेपाली समुदायले मनाउँदै आएको होलीलाई वर्षेनी विशेष रमाइलो बनाउने दुई पात्र छन् । पहिलो व्यक्ति हुन् कमल सत्याल । दोस्रो चाँही वेदराज बस्नेत । 

यी दुई व्यक्तिको रंग घँसाईबाट उम्किन सक्ने व्यक्ति शायद कोही छैनन् । ‘हा दाई, यो चाँही हाम्रो बीरगञ्जको होली’ भन्दै शीरदेखि जीउसम्म अबीरको पुरै प्याकेट खन्याइदिन्छन् सत्याल । बीरगञ्जका रैथाने सत्याल भोजपुरी लवज निकाल्दै होलीको रंगबाट कसैलाई जोगिन दिँदैनन् । 

अनि उनलाई पनि माथ गर्दै ‘हाम्रो झापाको होली यस्तो हुन्छ’ भन्दै बस्नेतले अनुहारको कुनै कुना बाँकी नरहने गरि फागु दलिदिन्छन् । मधेशको लवज निकाल्दै बस्नेत पनि को सानो, को ठूलो सबैलाई फागु दलिदिन्छन् । 

 

यी दुईले युलेसको होलीलाई विशेष रौनकता दिँदै आएका छन् । विगतका वर्षहरु जस्तै यसवर्ष पनि अन्य धेरै व्यक्तिसँगै सत्याल र बस्नेतले होली मनाउन आएका सबैलाई कुनै ठाउँ बाँकी नहुने गरि रंग दले । 

ड्यालस–फोर्टवर्थ इन्टरनेसनल एअरपोर्टसँगै जोडिएको युलेसको बियरक्रिक पार्कमा आयोजना गरिएको यसपालिको होलीलाई अझै रोमाञ्चक तुल्याउन स्थानीय व्यबसायी विकल ढकाल अझै सकृय भए । बस्नेत र सत्यालले दलेको रंगलाई अझै गाढा बनाउन पानीका बोतलले भिजाउने काम ढकालले गरे । 

शुक्रबारसम्म हावा चलेर चिसो रहेको ड्यालसको मौसम शनिबार एकाएक आउटडोर होली खेल्न अनुकुल परिणत भएको थियो । त्यसैले पिचकारी हानेपनि, बोतलका बोतल पानी टाउकोबाट खन्याइदिए पनि कसैले नमिठो अनुभव गरेनन् । सबै रमाए, सबै खुशी भए ।

रातो, पहेँलो, नीलो, हरियो, बैजनी, गुलाफी लगायत धेरै रंगका फागु प्रयोग गरिएको थियो । यी सबै रंग अनुहारमा दलिएका कारण अधिकांशका अनुहार चिनिदैनथ्यो । दाँत र स्वरका भरमा मान्छे चिन्नुपर्ने अवस्था आयो । 

हुनतः नेपालमा र नेपाल बाहिर चाडपर्व एकै दिन पर्छन् । तिथीको घटबढले गर्दा कहिलेकाँही चाडपर्वहरु एक दिन अघिपछि परेपनि केही दिनकै अन्तर भने पर्दैनन् । तर नेपालको सीमा नाघिसकेपछि चाडपर्व त्यही दिन मनाउन विरलै पाइन्छ । दशैंको टीका, तिहारको भाइटीका, जनैपूर्णिमा, तीज, शिवरात्री लगायतका पर्वहरु त्यही दिन मनाएपनि बाँकी अधिकांश भने सप्ताहन्त (शनिबार/आइतबार) मिलाएर मनाउनुपर्ने अवस्था छ । 

केही वर्ष पहिले, जतिखेर म क्यालिफोर्नियामा थिएँ । नेपाली नयाँ वर्ष मनाउने सिलसिलामा एकजना अग्रजले भन्नुभएको अहिले पनि सम्झिरहेको छु । उहाँ भन्नुहुन्थ्यो–‘हप्तादिन भरिको सुख साट्ने पनि सप्ताहन्तमा हो । अनि हप्तादिनभरिका यता अमेरिकादेखि लिएर नेपालसम्मका दुःखका घटना, आफन्तजनको वियोग पर्दा रुने समय पनि सप्ताहन्तमै निकाल्नुपर्छ ।’ 

भरखरै नेपालबाट आएको थिएँ । उहाँले के भन्नुभएको होला भनेर लामो समयसम्म मनमा गुनिरहेँ मैले । पछिपछि हुँदै गएपछि पत्तो लाग्यो नेपालमा जसरी जुन दिन चाड प¥यो त्यही दिन यहाँ कामबाट छुट्टी नमिल्ने हुँदा चाड मनाउन, भेटघाट गर्न पनि शनिबारै कुर्नुपर्ने रहेछ । अनि कसैलाई दुःख परेको छ भने भेट्न जाने, सहानुभूति दिने, आफैँलाई दुःख परेको छ भने पनि धक फुकाएर रुनका लागि पनि शनिबार या आइतबारनै निकाल्नुपर्ने रहेछ । 

नेपालमा फागु पूर्णिमा अर्थात होली विहीबार मनाइयो । तराई क्षेत्रमा भने शुक्रबार मनाइयो । अमेरिकामा भने संस्थागत रुपमा धेरै ठाउँहरुमा शनिबार फागु दलेर शनिबार मनाइएको छ । किन दुई दिनपछि मनाउनुपर्यो भन्ने प्रश्न उठ्न सक्छ । जसको जवाफ मैले माथिनै दिइसकेँ । अर्थात खुशी साटासाट गर्न पनि शनिबारनै कुर्नुपर्छ र कुनै दुःखमा सान्त्वना दिन अनि दिन पनि शनिबार या आइतबारकै प्रतिक्षा गर्नुपर्छ ।

यसै क्रममा टेक्ससको युलेसवासीले फागु पूर्णिमा अर्थात होली शनिबार भव्य रुपमा मनाएका छन् । युलेस नेपाली सोसाइटी र हिमालयखबर अनलाइनले संयुक्त रुपमा आयोजना गरेको होलीले एउटा नयाँ ट्रेन्ड स्थापित पनि गरेको छ । सहभागी सबैलाई निशुल्क रुपमा खानेमात्र होइन पिउने र रंग पनि उपलव्ध गराउने काम भयो । धेरै संस्थाहरुले आयोजना गर्ने कार्यक्रम व्यबसायीक रुपमा गएको गुनासो विगतका वर्षहरुमा सुनिएपछि यसपटक सबै कुराहरु निशुल्क गरिएको युलेस सिटी काउन्सिल सदस्य समेत रहेका नेपाली समुदायका अगुवा टीका पौडेलले बताए ।

विगत वर्षहरुमा नेपालीहरुले टीकापुर भनेर चिन्ने सिग्नेट ड्राइभ नजिकै रहेको पार्कमा होली आयोजना हुने गरेको थियो । तर गाडी पार्किङ्गको समस्या चर्को रुपमा उठेपछि यसपटक ठूलो पार्कमा होली आयोजना गरिएको हो । 

युलेसको होली खेल्नका लागि युलेसबासी मात्र नभएर साउथ टेक्ससमा रहेको स्टेफनभीलदेखि हरिबोल भण्डारी, इष्ट टेक्ससदेखि राजेश अर्याल, ओक्लाहोमादेखि अमृत कट्टेल जम्मा भए । भण्डारी, अर्याल, कट्टेलको सहभागिताले अझै रौनकता बढेको थियो ।

नेपाली समाजका पूर्ब अध्यक्ष कृष्ण लामिछानेलाई सबैले समातेर रंग दलेर चिन्नै नसक्ने तुल्याइदिए । लगत्तै हरिबोल भण्डारीको हालत त्यस्तै बनाइयो । कट्टेललाई त बोतलको पानी समेत खत्याएर धेरैले मज्जा लिए । केही ढिलो गरि आइपुगेका एनआरएन अमेरिकाका उपाध्यक्ष सुमन थापा र नेपाली समाजका पूर्ब अध्यक्ष दिनेश शर्मालाई बाटैमा रंग दलेर चिन्न नसक्ने बनाइयो । पिताको आशौच बारेर बसेका अर्का उपाध्यक्ष विकास उप्रेतीलाई भने धेरैले चिन्ने भएका कारण रंगको लसपसमा नपारेर विवेक प्रयोग गरे । 

‘मलाई सानो टीका मात्र है’ भन्नेलाई ‘हुन्छ’ भन्दाभन्दै एकैछिनमा चिन्नै नसक्ने रुपमा परिणत गरेको दृश्य निकै रमाइलो थियो । के वृद्ध, के बालक, के युवक, के युवती सबैलाई रम्न र रमाउन सक्ने वातावरण मिलाइएको थियो यसपटकको होलीमा । डिजे सहितको संगीत, खानपिनले गर्दा विद्यार्थी समुदाय समेत नेपालको न्यास्रो मेट्दै रमाएका थिए । 

दिउँसो २ बजे सुरु भएर ठीक ६ बजे समापन भएको युलेसको होलीमा झण्डै एकहजार दुईसय जना सहभागी भएका थिए । नेपालीहरुको संख्या देखेर अष्ट्रेलियाबाट कार्यक्रमको सिलसिलामा अमेरिका आएका पत्रकार भरतराज पौडेल समेत अत्यन्तै खुशी भए । 

ड्यालसको नेपाली समाज टेक्सस र इन्द्रेणी सांस्कृतिक संघले आइतबार पनि होली आयोजना गर्दैछन् । ग्रेपभाइन लेकमा आयोजना गर्न लागिएको संयुक्त होलीमा सहभागिताका लागि दुबै संस्थाले आव्हान गरेका छन् ।