अमेरिका । एनआरएनए एनसिसी अमेरिकाबाट आइसिसी प्रतिनिधि डेलिगेटका लागि विवादै विवादका बीच शुक्रबार भएको चुनावमा १०५० भोटबाट ९ जना निर्वाचित भएका छन् ।
दक्षिण (साउथ) र पश्चिम (वेष्ट) क्षेत्रका लागि मात्र चुनाव भएको थियो । अन्य दुई क्षेत्रबाट भने डेलिगेट र्निविरोध चयन भएका थिए । दुई क्षेत्रमा करिब १२ हजार मतदाता सदस्य थिए ।
यो चुनाव आइसिसी विधानअनुसार नभएकाले बहिष्कार गर्न समाजिक सञ्जालमार्फत केहीले अनुरोधसमेत गरेका थिए । एनआरएनए अमेरिकाका एक जना उपाध्यक्षसमेत यो चुनावको पक्षमा थिएनन् ।
एनसिसी कार्यसमितिका अधिकांश पदाधिकारीले भने यो चुनावलाई स्वीकारेका छन् । चुनावपछि एनआरएनए अमेरिकका अध्यक्ष बुद्धि सुवेदीले अगष्ट १५ सम्म डेलिगेटको सूची दिइसक्नु पर्ने भएकाले आइसिसीले अगष्ट ११ मा पठाएको पत्रअनुसार चुनाव भएको बताए । अमेरिकाज क्षेत्रका क्षेत्रीय संयोजक रामसि पोखरेलले पनि यो चुनाव गर्नै पर्ने बाध्यता भएको बताएका थिए ।
विवादका बीच १८ जना डेलिगेटका लागि शुक्रबार चुनाव भएको थियो । १८ मध्ये पनि करिब आधा डेलिगेट पदमा निर्विरोध भएको थियो ।
आइसिसीको निर्देशनअनुसार गत बुधबार साँझ एनआरएनए एनसिसी अमेरिका बोर्डले निर्वाचन समितिलाई डेलिगेटका चुनाव प्रक्रिया पूरा गर्न अनुरोध गरेको थियो ।
निर्वाचन समितिले चुनावी प्रक्रिया पहिल्यै नै अगाडि बढाए पनि आइसिसीको पत्रका आधारमा एनसिसी अमेरिकाले रोक्न अनुरोध गरेको थियो । यसअनुसार त्यसबेला तय भएको समयमा चुनाव भएको थिएन ।
शुक्रबार चुनावबाट साम्भ लामिछाने, नेत्र खत्री केसी, रोशनकुमार ढुंगाना, दीपक घिमिरे र भानुझ आचार्य साउथ क्षेत्रबाट निर्वाचित भएका छन् । वेष्टबाट नारायण खनाल, कुमारजंग कार्की, कृष्णराज गिरी र विराज भण्डारी डेलिगेट भएका छन् ।
अब आइसिसीले यो चुनाव नतिजालाई मान्छ वा मान्दैन भन्ने अन्योल भने छ । एनआरएनए अमेरिकाको विषयम आइसिसीका पदाधिकारी नै विवादित छन् । बैठकमा उनीहरुबीच विवाद हुने गरेको छ ।
यो चुनाव गर्न हुन्छ वा हुँदैन भन्ने बारेमा पनि आइसिसीले स्पष्ट मार्गनिर्देशन गर्न सकेको थिएन ।
प्रतिक्रिया