ड्यालस (टेक्सस) – आउँदो आइतबार ड्यालसको नेपाली मन्दिरमा एकै दिन चारवटा कार्यक्रमहरु आयोजना हुँदैछन् ।

 

जनैपूर्णिमाको दिन परेकोले मन्दिरमा जनैफेर्ने कार्यक्रमदेखि लिएर रक्तदान, निशुल्क स्वास्थ शिविर र सोही दिन साँझ घर किन्नेहरुका लागि जानकारीमुलक कार्यक्रमहरु राखिएको छ । 

मन्दिरमा बिहान सबेरैबाट जनैपूर्णिमाको कार्यक्रम राखिएको पूजा समितिले जनाएको छ । 

 

त्यस्तै ३६ औं विपि स्मृति दीवसका अवसरमा नेपाली जनसम्पर्क समिति ड्यालस फोर्टवर्थ र वेस्ट टेक्सस च्याप्टरको संयुक्त आयोजनामा रक्तदान कार्यक्रम राखिएको छ । बिहान ११ देखि दिउँसो ४ बजेसम्म रक्तदान गर्न सकिने जनसम्पर्क समितिले जनाएको छ । 

 

त्यस्तै सोही दिन बिहान १० देखि १ बजेसम्म निशुल्क स्वास्थ शिविर राखिएकोले सहभागी भएर लाभ लिनका लागि नेपाली समाज टेक्ससका अध्यक्ष सुमन थापाले आग्रह गरेका छन् ।

 

शिविरमा डा. संजीव श्रेष्ठ, झरना श्रेष्ठ, विष्णु सापकोटा र शर्मिला श्रेष्ठले स्वास्थ जाँच गर्नेछन् । प्रयोगशाला (ल्याब) आवश्यक पर्नेलाई २० डलर शुल्कमा ती सबै सुविधाहरु उपलव्ध गराइने समेत जनाइएको छ । 

 

आइतबारनै डिएफडब्लु यति होम्सका तर्फबाट सुरज पौडेलले घर किनबेच संबन्धमा कार्यशाला गोष्ठी आयोजना राखेका छन् । दिउँसो ४ देखि साँझ ७ बजेसम्म कार्यक्रम राखिएको छ । यो गोष्ठीबाट घर किन्न र बेच्न चाहने दुबै पक्षले फाइदा लिन सक्नेछन् । 

 

आइतबार आयोजना हुने चारवटै कार्यक्रमले नेपाली समुदायमा महत्वपूर्ण प्रभाव पार्ने भएकोले मन्दिरमा विशेष र ठूलो जमघट हुनेछ ।