हिमालयखवर संवाददाता

अमेरिका  – गैर आवासीय नेपाली संघ (एनआरएन) अमेरिकाको सदस्य बन्नका लागि लगभग ३६ घण्टा बाँकी छँदा चारहजार आठसय सदस्य बनेका छन् ।

विहीबार बिहान ९ बजेसम्मको तथ्यांकका अनुसार चारहजार दुईसय ८० साधारण सदस्य बनेका छन् । पाँचसय २३ जनाले आजीवन सदस्यता लिएका छन् । 

 

एनआरएन अमेरिकाको सदस्य हुनका लागि शुक्रबार राति १२ बजेसम्म आवेदन दिएर शुल्क तिरिसक्नुपर्नेछ । एनआरएन अमेरिकाले शुक्रबार पछि सदस्यतको लागि एक मिनेट पनि समय नथप्ने निर्णय गरेर सार्वजनिक गरिसकेको छ ।

 

मिडिया संयोजक बाल जोशीका अनुसार सदस्यताको आवेदन गर्ने समय थप हुन्छ भन्ने हल्लामा कुनै सत्यता नरहेको र समय थप नहुने उल्लेख गरे । ‘सदस्यताको लागि आवेदन दिने म्याद नथप्ने निर्णय बोर्ड बैठकले गरिसकेको छ, तसर्थ फेब्रुअरी १५ तारिक शुक्रबार राति १२ बजे अगावै आवेदन दिएर शुल्क तिरिसक्नुहुन अनुरोध छ,’ उनले भने ।

 

अहिलेसम्मको तथ्यांकलाई केलाउँदा अमेरिकाका सात राज्यबाट एकजना पनि सदस्य भएका छैनन् । अलास्का, मेइन, मोनाटा, नर्थ डकोटा, साउथ डकोटा, भरमन्ट र वमिङ राज्यमा एकजना पनि सदस्य भएका छैनन् । बाँकी ४३ राज्यमा रहेका नेपालीहरुले सदस्यता लिएका छन् । 

 

९ बजेसम्मको तथ्यांकक आधारमा सबैभन्दा बढी सदस्य न्यूयोर्कबाट भएका छन् । न्यूयोर्क राज्यबाट साधारण र आजीवन गरि एकहजार एकसय ४६ ले सदस्यता लिएका छन् । त्यस्तै दोस्रोमा टेक्सस छ । टेक्ससबाट ९ सय १८ ले सदस्यता लिएका छन् । तेस्रोमा ४ सय ४ सदस्य सहित मेरिल्याण्ड र चौथोमा ३ सय ३८ सहित क्यालिफोर्निया रहेको छ । 

 

न्यूयोर्कबाट विगत तीन दिनयता अप्रत्याशीत रुपमा सदस्यता आवेदन बढेको छ । कोही कसैको चलखेल हुनसक्ने आशंकाका रुपमा त्यो सदस्यता वृद्धिदरलाई हेरिएको छ । स्रोतका अनुसार त्यहाँबाट एउटा समुदायको सदस्यता आवेदन शंकास्पद रुपमा बढेको छ । जसलाई भेरिफिकेसन समितिले छानबीन गरेर समेत भ्याएको छैन । 

 

अमेरिकामा रहेका नेपाली समुदायलाई सदस्यता लिनका लागि एनआरएन लगायत अन्य संघसंस्थाका प्रमुखहरुले आह्वान गर्दै आएका छन् ।