ड्यालस (टेक्सस) । गत डिसेम्बर तेस्रो साता निर्वाचित नेपाली समाज टेक्ससको नयाँ कार्य समितिले शनिबारदेखि पदभार ग्रहण गरेको छ ।

एक विशेष र भव्य कार्यक्रमबीच नयाँ कार्यसमितिलाई निर्वाचन समितिका प्रमुख बैकुण्ठ बिक्रम थापाले पदको शपथ ग्रहण गराएका थिए । गत डिसेम्बर २३ मा भएको निर्वाचनबाट राजेन्द्र वाग्लेको नेतृत्वमा नेपाली समाज टेक्ससको नेतृत्व निर्वाचित भएको छ ।

कार्यक्रममा नव निर्वाचित अध्यक्ष वाग्लेले संस्थाका सबै सदस्यहरुले गर्व गर्नेगरि नयाँ कार्यकालमा समुदायका लागि काम गर्ने प्रतिवद्धता गरे । नयाँ टिम, नयाँ स्पिरिटका साथ सबैले गर्व गर्नेगरि काम गर्ने उनले बताए । सोही अवसरमा निर्वाचनमा अध्यक्षका प्रतिस्पर्धी कमल सत्यालले संस्थाको नेतृत्व भन्दा बाहिर रहेर पनि समुदायका हितका लागि सहयोग गर्ने सदा तत्पर रहेको बताए ।

कार्यक्रममा बेडफोर्ड सिटीका मेयर डन कोगन, नेपाल सरकारका महाबाणिज्यदूत प्रेमराजा महत, युलेस सिटी काउन्सिल सदस्य टीका पौडेल लगायते नयाँ कार्यसमितिलाई शूभकामना सहित सहकार्यका लागि तयार रहेको बताए ।

कार्यक्रममा नवनिर्वाचित महासचिव विजय भुसाललाई निवर्तमान महासचिव सन्देश उप्रेतीले संस्थाको माइन्युट हस्तान्तरण गरेका थिए । त्यस अवसरमा संस्थाको निर्वाचनमा सहयोग गर्नेहरुलाई निर्वाचन समितिका तर्फबाट प्रशंसापत्र समेत वितरण गरिएको थियो ।

नेपाली समाज टेक्सस २५ वर्ष अघि स्थापना भएको संस्था हो । केही महिना अघिमात्र नेपाल समाज टेक्ससले आफ्नो रजत जयन्ति भव्य रुपमा मनाएको छ ।