काठमाडौँ । नेपाल सरकार, मन्त्रिपरिषद्को शुक्रबारको बैठकले नेपाल प्रहरीको महानिरीक्षक (आइजिपी) पदमा प्रहरी अतिरीक्त महानिरीक्षक (एआइजी) वसन्तबहादुर कुँवरलाई पदोन्नति गर्ने निर्णय गरेको छ ।

प्रधानमन्त्री पुष्पकमल दाहाल ‘प्रचण्ड’ का प्रेस संयोजक सूर्यकिरण शर्माले कुँवरलाई आइजिपीमा बढुवा गर्ने मन्त्रिपरिषद्ले निर्णय गरेको जानकारी दिए । यही चैत ६ गतेको निर्णयले उनी एआइजीमा बढुवा भएका थिए । सरकारले उनलाई एआइजीको फुली लगाएको दुई दिनमै आइजिपीमा बढुवा गर्ने निर्णय गरेको हो ।

प्रहरी महानिरीक्षकका लागि कुँवरसहित एआइजीहरू टेकप्रसाद राई, दीपक थापा, श्यामलाल ज्ञवाली र किरण बज्राचार्य प्रतिस्पर्धामा रहेका थिए । कुँवर अङ्क तालिकामा १ नम्बरमा रहेका थिए । यसपटक भने महानिरीक्षकको नियुक्ति निर्विवाद रूपमा भएको छ ।

हालका प्रहरी महानिरीक्षक धीरजप्रताप सिंह शुक्रबार राति १२ बजेदेखि ३० वर्षे प्रहरी सेवाको उमेर हदका कारण अनिवार्य अवकासमा जाँदै छन् । काम गर्न सक्ने सक्षम, कमाण्ड गर्न सक्ने, नेतृत्व दिनसक्ने लगायतलाई आधार मानेर नेपाल सरकारले जो कोहीलाई पनि आइजिपी बनाउन सक्ने अवस्था कानुनी आधार छ । ।

विसं २००७ साल चैतमा स्थापना भएको प्रहरीमा उनी ३०औँ आइजिपी नियुक्त भएका हुन् । पहिलो महानिरीक्षक तोरणशमशेर राणा हुन् । तर, प्रहरीले संगठन स्थापनाको ५ वर्षपछि विसं २०१२ मा ऐन आएको दिनलाई प्रहरी स्थापना दिवस मान्दै आएको छ । यद्यपि हालसम्म संगठनमा २९ जनाले नेतृत्व गरिसकेका छन् ।

को हुन् आइजिपी कुँवर ?

२०२६ चैत १५ मा अर्घाखाँचीको सन्धीखर्कमा बाबु भीमबहादुर कुँवर र आमा नमकलाबाट जन्मिएका कुँवर २०५१ चैत ५ मा निरीक्षकबाट प्रहरी सेवा प्रवेश गरेका थिए । अहिलेको ३० वर्षे सेवाअवधि कायम रहे कुँवर २०८१ चैतमा अवकाशमा जाने छन् ।

२०६३ भदौ ८ मा डिएसपी, २०७१ फागुन १० मा एसपी, २०७५ फागुन ६ मा एसएसपी र २०७९ असार १७ मा डिआइजी बनेका उनले विभिन्न जिल्लाका साथै प्रहरी प्रधान कार्यालय र काठमाडौँ उपत्यका अपराध अनुसन्धान कार्यालयमा रहेर कार्यसम्पादन गरिसकेका छन् ।

त्रिभुवन विश्वविद्यालयबाट व्यापार प्रशासनमा स्नातकोत्तर उनी इन्स्पेक्टर, डिएसपी र एसपी हुँदा विभिन्न जिल्लामा रहेर काम गरिसकेका छन् । गुल्मी, सुनसरी, सिन्धुली, मोरङ, दाङ, रोल्पा, काठमाडौँ, नवलपरासी, डोटी, चितवन, नुवाकोट, धादिङ, प्रहरी युक्ति तालिम महाविद्यालयलगायत युनिटमा रहेर काम गरेको अनुभव उनीसँग छ ।

उनले विसं २०७३ मा चितवन प्रहरी प्रमुख (एसपी) रहँदा सर्वोत्कृष्ट जिल्ला प्रहरी प्रमुखको अवार्डसमेत प्राप्त गरेका थिए । कुँवर गत असार १७ मा एसएसपीबाट डिआइजीमा बढुवा भएका थिए । डिआइजीमा बढुवा हुँदा उनी काठमाडौँ उपत्यका अपराध अनुसन्धान कार्यालयको प्रमुखका रुपमा कार्यरत थिए ।

त्यसअघि उनले प्रहरी प्रवक्ताका रुपमा काम गरेका थिए । डिआईमा बढुवापछि भने प्रहरी प्रधान कार्यालय कार्यविभागमा पदस्थापन भएका उनी पछिल्लो पटक मधेस प्रदेश प्रहरी प्रमुखको जिम्मेवारी सम्हालेका थिए ।