ड्यालस (टेक्सस) । संयुक्त राज्य अमेरिका र नेपालबीच कुटनैतिक सम्बन्ध स्थापना भएको ७५ औं वर्ष पुगेको अवसरमा टेक्ससको युलेस सिटीले आउँदो फेब्रुवरी ११ तारिक विशेष कार्यक्रम आयोजना गर्दैछ ।

कुटनैतिक सम्बन्ध स्थापनाको ७५ वर्ष पुगेको अवसरमा सो दिन हालसम्मका गतिविधि र आगामी दिनका विषयमा अन्तरकृया हुने भएको छ । युलेसको फेमिली लाइफ सेन्टरमा दिउँसो १ बजेदेखि ३ बजेसम्म नेपाली र अमेरिकन समुदायबीच छलफल गर्दै कार्यक्रम आयोजना गर्न लागिएको सिटी काउन्सिलका सदस्य टीका पौडेलले जानकारी दिए ।

अमेरिका र नेपालबीच सन् १९४७ अप्रिल २५ मा कुटनैतिक सम्बन्ध कायम भएको थियो । बेलायत पछि नेपालको कुटनैतिक सम्बन्ध कायम भएको अमेरिका दोस्रो देश हो ।

हालसम्म नेपालको कुटनैतिक सम्बन्ध स्थापना भएका देशको संख्या एकसय ७७ पुगेको छ । अमेरिका नेपाल सम्बन्धले ७५ वर्ष पुरा गरेको अवसरमा दुई देशबीच जनस्तरमा समेत अमेरिकामा बिभिन्न कार्यक्रमहरु यसवर्ष हुने क्रममा छन् ।

‘नेपाल चिनाउने, दुई देशबीचको सम्बन्धका बारेमा अमेरिकी जनस्तरमा जानकारी गराउनका लागि यो कार्यक्रम गर्न लागिएको हो’ काउन्सिल सदस्य पौडेलले भने ।

कार्यक्रममा सिटीमी मेयर लिण्डा मार्टिन, सदस्य पौडेल लगायत स्थानीय जनप्रतिनिधिहरु र राजनैतिक दलका प्रतिनिधिहरुको सहभागिता हुनेछ ।