कोलोराडो, अमेरिका । नेपालीहरुको महान् चाड विजयादशमी तथा शुभ दीपावलीको अवसरमा कोलोराडो निवासी नेपालीहरुले शुभकामना सांस्कृतिक साँझ कार्यक्रम आयोजना गरी एकआपसमा शुभकामना आदान प्रदान गर्ने भएका छन् ।
नेपालीहरुको साझा संस्था रकी माउन्टेन्ड फ्रेन्डस अफ नेपालको आयोजना तथा यहाँस्थित सबै संघसंस्थाको सहभागितामा आगामी अक्टोबर २२ तारिक शनिबार डेनभरस्थित डेनभर साउथ हाइस्कुल (1700 E Louisiana Ave. Denver Co.80210) मा साँझ ५ बजेदेखि ९:३० बजेसम्म शुभकामना सांस्कृतिक साँझ कार्यक्रम आयोजना हुने संस्थाका अध्यक्ष टीका पौडेलले बताएका छन् ।
लोकप्रिय गायक प्रकाश श्रेष्ठ, गायिकाहरु रिमा गुरुङ, शशि रावललगायतका कलाकारहरुको जोडदार प्रस्तुति रहने कार्यक्रममा, कोलोराडोमा सक्रिय संघसंस्थाका प्रतिनिधि, व्यवसायी, बुद्धिजीवी, कलाकार, साहित्यकार, पत्रकार, नेपाल र नेपालीप्रति सद्भाव राख्ने स्थानीय अमेरिकीहरु तथा सर्वसाधारण सबैलाई कार्यक्रममा सहभागी भई नेपाल र नेपालीको संस्कृति संरक्षण र पहिचानमा सहयोग गर्न उनले सबैलाई चुले निम्तो गरेका छन् ।
सबै नेपालीहरु एकै ठाउँमा भेला भई एकआपसमा भलाकुसारी गर्दै नेपालीहरुको महान् चाड विजयादशमी तथा शुभ दीपावलीको शुभकामना आदान प्रदान गर्न पाउने महत्त्वपूर्ण अवसर हो । त्यसैले आफ्ना साथीभाइ, इष्टमित्र, छरछिमेक सबैलाई कार्यक्रममा सहभागी हुन खबरगरी कार्यक्रमलाई सफलताका साथ सम्पन्न गर्न सहयोग गरिदिन हुनसमेत उनले सबैलाई अनुरोध गरेका छन् ।
संस्थाको आयोजनामा कोलोराडोमा हरेक वर्ष दसैँ तिहार कार्यक्रमको आयोजना हुँदै आएको छ ।
प्रतिक्रिया