कोलोराडो, अमेरिका । कोलोराडोको नर्थग्लेनस्थित क्रसरोड कम्युनिटी सेन्टरमा शनिबार एक समारोहबीच नेपाली भाषा पाठशालाको शुभारम्भ गरिएको छ ।

 

कोलोराडोमा सक्रिय संस्थाहरु अन्तर्राष्ट्रिय साहित्य समाज कोलोराडो च्याप्टर, नेपाली घर, रकी माउन्टेन्ड फ्रेन्ड्स अफ नेपाल, सिष्टरग्रुप दिदी बहिनी समूह कोलोराडो, कोलोराडो नेवाः खल र ब्लड डोनर्स अफ अमेरिकाको संयुक्त प्रयासमा सुरु भएको हो ।

 

भाषा पाठशालामा सहभागी हुन आएका बालबालिकाले संयुक्तरुपमा रिबन काटेर कार्यक्रम हलमा प्रवेश गरेका थिए । नेपाली, अमेरिकन राष्ट्रियगानसँगै गणेश जन्दना र सरस्वती बन्दना गाएर कार्यक्रम सुरु गरिएको थियो । प्रत्येक शनिबार दिउँसो २ बजेबाट ४ बजेसम्म सञ्चालन हुने नेपाली भाषा पाठशालामा सहभागी हुन ३२ जना बालबालिकाहरुले आज नाम दर्ता गराएका बताइएको छ ।

 

कार्यक्रमको महत्त्वबारे प्रकाश पार्दै अन्तर्राष्ट्रिय साहित्य समाज कोलोराडो च्याप्टर अध्यक्ष राजु सिटौलाले प्रवासमा नेपाल र नेपाली चिनाउने मुख्य माध्यम नै भाषा संस्कृति भएको र यहाँ जन्मेका बालबालिकाहरुलाई भाषा संस्कृति सिकाउँदै नजाने हो भने भाषा संस्कृति यही पुस्तामा मात्र सीमित रहने खतरा बढ्दै गएको कारण भाषा शिक्षाको कार्यक्रम सुरु गर्न लागिएको बताए । 

 

उनले यस भाषा कक्षालाई सफल पार्न सधैँ सबैको साथ र सहयोग रहिरहने विश्वास व्यक्त गरे । अन्तर्राष्ट्रिय साहित्य समाज कोलोराडो च्याप्टर महासचिव किरण अधिकारीले सञ्चालन गरेका कार्यक्रममा भाषा पाठशालामा बालबालिकाहरुलाई अध्यापन गराउने गुरुआमा र गुरुबाहरुले पनि आ–आफ्नो धारणा राखेका थिए । 

 

यसरी धारणा राख्नेहरुमा धन पौडेल, प्रतिभा शर्मा र हरिभक्त आचार्य रहेका थिए । उनीहरुले बालबालिकाहरुको क्षमता मूल्यांकन गरी त्यसको आधारमा कक्षा अगाडि बढाउने योजना रहेको बताए । सो कार्यक्रमलाई प्रभावकारी बनाउन अभिभावकको ठूलो हात रहेको बताउँदै यसलाई सफल पार्न सबैको साथ र सहयोग रहने आशा व्यक्त गरे ।

 

कार्यक्रममा आयोजक संघसंस्थाका प्रतिनिधि पाठशालामा सहभागी बालबालिका र उनका अभिभावक, गन्यमान्य, समाजसेवीहरुको उल्लेख्य उपस्थिति रहेको थियो । कोलोराडोकै अरोरामा यसअघि नै भाषा पाठशालाको सुरु भइसकेको छ ।  

 

यसअघि दुई वर्षसम्म सञ्चालन भएको लङमन्टमा भने यसवर्ष सञ्चालन गर्ने योजना नभएको बताइएको छ । भाषा कक्षामा उपस्थित छात्रछात्राहरुलाई लेख्न पढ्न मात्र नभएर, नेपाली भाषामा बोल्ने, कथा, कविता भन्ने, नाचगान गर्ने, कार्टुन देखाउनेजस्ता विभिन्न रचनात्मक माध्यमबाट भाषा सिकाउने गरिएको छ ।