क्यालिफोर्निया । क्यालिफोर्नियाको सानफ्रान्सिस्कोस्थित हक्युलेर्स सिटीले नेपालीहरुको नयाँ वर्ष अर्थात अप्रिल १४ लाई नेपाल डेका रुपमा मनाउने प्रस्ताव पारित गरेको छ । 

 

सिटी काउन्सिलको मंगलबार बसेको बैठकले सो प्रस्ताव पारित गरेको हो । यससँगै नेपाली नयाँ वर्ष (अप्रिल १४) ले अमेरिकामा औपचारिक मान्यता प्राप्त गरेको छ । 

 

जुमबाट प्रत्यक्ष प्रशारण गरिएको सिटी काउन्सिलको बैठकमा नेपालका तर्फबाट नेपाली राजदूत प्राडा श्रीधर खत्री, नेपाल डे प्रस्तावका मुख्य संयोजनकर्ता डिल्ली भट्टराईलगायत बे एरियाका मुख्य अभियन्ताहरुको सहभागिता रहेको थियो । यस्तै, हक्युलेर्स सिटीका तर्फबाट मेयर डिओन बेली, उपमेयर तथा सिटी काउन्सिलका पदाधिकारीहरुको सहभागिता रहेको थियो ।

 

बैठकको सम्बोधन गर्दै राजदूत खत्रीले अमेरिकी सहरमा नेपालीहरुको उपस्थिति बढ्दै जानु र यहाँका शिक्षा रोजगारलगायत प्रशासनिक पहुँचमा प्रभाव बढ्नुले नेपालीहरुको उपस्थिति सराहनीय रहेको बताए । 

 

सन् १९६४ मा आफू अमेरिका आउँदा औँलामा गन्न सकिने नेपालीहरु रहेको स्मरण गर्दै आज अमेरिकाभर रहेको देख्दा खुसी लागेको बताए । उनले हक्युलेस सिटीले औपचारिक रुपमा ‘नेपाल डे’ मनाउने निर्णय गर्नु नेपाल र अमेरिकाबीचको सम्बन्धको ‘सेतु’ भएको बताए ।

 

नेपाल डे प्रस्तावका मुख्य संयोजनकर्ता डिल्ली भट्टराईले हक्युलेस सिटीले आपचारिकरुपमा नेपाल डे मनाउने निर्णय गरेकोमा आमनेपालीको तर्फबाट आभार व्यक्त गर्दै भने, ‘निर्णयले हामीलाई अघि बढ्न हौसला र अवसर प्रदान गरेको छ । केही महिनाअघिमात्र हक्युलेस सिटीमा बसाइँ सरेका भट्टराई हक्युलेस हाइस्कुल प्यारेन्टस् टिचर्स अर्गनाइजेसन (पिटिओ) का उपाध्यक्ष छन् । 

 

सिटीले औपचारिक मान्यता दिएपछि अब नेपालीहरुले आफ्नो कला संस्कृति, चाडबाड एवम् रीतिरिवाजलाई परिस्कृत गर्न सिटीको सहयोगसमेत प्राप्त गर्न सक्ने भएका छन् ।

 

सो निर्णयबाट बे एरियामा बसोबास गर्ने धेरै नेपालीहरुले यस कार्यलाई निकै प्रशंसनीय मानेका छन् । बे एरियाका सक्रिय अभियन्ता एवम् युवा व्यवसायी प्रितेश कार्कीले यस निर्णयबाट अमेरिकी राजनीतिको मूलधारमा समेत अगाडि बढ्न नेपाली मूलका अमेरिकीहरुलाई औपचारिकरुपमा ढोका खुलेको विश्लेषण गरेका छन् ।