अमेरिका । विट्क्वाइन, इथेरियम, डोजक्वाइनलगायत क्रिप्टोकरेन्सीको भाउ तल झरेको छ । के यो किन्ने समय हो ? अहिलेसम्म क्रिप्टोकरेन्सीलाई सबैभन्दा जोखिमयुक्त लगानी मानिएको छ ।
जोखिममा नाफा वा नोक्सानको सम्भावना पनि बढी हुन्छ । विट्क्वाइनले केही दिनयता यसको बजार मूल्य झण्डै आधा गुमाएको छ । उच्च हुँदा एउटाको ६४ हजार अमेरिकी डलरसम्म पुगेको विट्क्वाइनको मूल्य ३० हजार डलरको आसपासमा पनि आयो । आइतबार बिहान यो ३३ हजार डलरमा कारोबार भइरहेको छ ।
इथेरियमको अवस्था पनि यस्तै छ । ४ हजार डलरभन्दा माथि पुगेको यसको मूल्य पनि २ हजार डलरभन्दा तल झर्यो । डोजक्वाइनको मूल्य पनि आधाले घटेको छ । अन्य क्रिप्टोकरेन्सीले पनि यसरी नै झरेका छन् ।
टेस्लाका प्रमुख इलन मक्सले गाडी बिक्री गर्दा विट्क्वाइन स्वीकार नगर्ने ट्वीटपछि क्रिप्टोकरेन्सी ओरालो लाग्न थालेको थियो । त्यसपछि अमेरिकी सरकारले क्रिप्टोकरेन्सीको कारोबार राजश्व विभाग आइआरएसलाई दिनुपर्ने प्रावधान सार्वजनिक गर्यो । यसले गर्दा बजारमा क्रिप्टोको मूल्य घट्न थालेको थियो ।
यसैबीचमा गत साता चीन सरकारले क्रिप्टोकरेन्सी कारोबारलाई सीमित गर्ने र आफैँले डिजिटल मनी ल्याउन लागेको सार्वजनिक गर्यो । यो समाचारले अब क्रिप्टोको भविष्य के हुन्छ भन्नेमा प्रश्न उठेको छ । क्रिप्टोकरेन्सी परम्परागत पैसा जस्तो होइन । परम्परागत पैसाभन्दा डलर रुपैयाँ, पाउण्ड वा युरोलाई जारी गर्ने सरकारले प्रत्याभूत गरेका हुन्छन् ।
विश्वकै शक्तिशाली मुद्रा अमेरिकी डलरमा यो लिगल टेण्डर हो भन्ने लेखिएको छ । प्रत्येक डलरमा अमेरिकी सरकारका तर्फवाट ट्रेजरी र गभर्नरले हस्ताक्षर गरेका हुन्छन् ।
नेपाली रुपैयाँमा पनि यसको मूल्य (एक हजारको नोटमा एक हजार बराबर) माग्न आएमा त्यति बरावरको प्रत्याभूति दिन्छौँ भनिएको छ । यसको मतलव एक हजार रुपैयाँ बराबरको वस्तु दिन्छौँ भनेको हो । यसमा सरकारका तर्फबाट राष्ट्र बैंकका गभर्नरले हस्ताक्षर गरेका हुन्छन् ।
तर, क्रिप्टोकरेन्सीलाई कसैले पनि प्रत्याभूति गरेको हुँदैन । यो बजारले नै निर्धारण गर्छ । विट्क्वाइन कसले बनायो भन्नेसमेत जानकारी छैन । तर, क्रिप्टोकरेन्सीलाई नयाँ मुद्राका रुपमा लिइएको छ । विशेष गरी युवाहरु यसमा आकर्षित छन् । यसैले यसको बजारमा मूल्य देखिएको हो ।
विट्क्वाइनको उतारचढाव यो पहिलोपटक भने होइन । केही वर्षअघि एउटा विट्क्वाइनको २० हजार डलर पुग्यो । यस्तै हल्लाहरु भए । आए । फेरि यसमा ओरोलो लाग्यो । ४ हजार डलरभन्दा तल झर्यो । केही समय यस्तै चल्दै थियो । भाउ बढेर ६४ हजारसम्म पुग्यो । त्यो बेला चार हजारमा किन किनिन होला भन्नेहरु पनि छन् । २० हजार पुगेर घट्न थाल्दा आत्तिएर बिक्री गर्ने थुप्रै नेपालीहरु पनि छन् । फेरि बढ्यो ? पछुताउनेहरु छन् ।
बजार उतारचढावलाई हेरेर लगानी गर्दा जोखिम कम गर्न सकिन्छ । अहिले त्यत्ति भन्न सकिन्छ क्रिप्टोकरेन्सीले बजार लिन पनि सक्छ । लोप भएर पनि जान सक्छन् ।
प्रतिक्रिया