-हिमालय खबर, न्युयोर्क

न्युयोर्कमा मुख्य कार्यालय रहेको युनाइटेड शेर्पा एसोसिएसन अर्थात् शेर्पा किदुग अमेरिकालाई ५० हजार अमेरिकी डलर सहयोग प्राप्त भएको छ । 

 

शेर्पा किदुगका आजीवन सदस्य स्व. आङ् पासाङ् लामा [गोल्डेन] को परिवारबाट पचास हजार डलर दान प्राप्त भएको किदुगका अध्यक्ष उर्गेन शेर्पाले बताए । 

 

सो दान रकम न्युयोर्कमा निर्माण हुन लागेको बौद्ध स्तुपको लागि प्राप्त भएको जनाइएको छ । शेर्पा किदुगद्वारा गतसाल न्युयोर्कको वालकिलमा बौद्ध स्तुप निर्माणको लागि ६१.३ एकड जग्गा खरीद गरिएको थियो । 

 

सोही जग्गामा निर्माण हुन लागेको बौद्ध स्तूपको लागि लामा परिवारले सहयोग गरेको हो । जम्मा कबोल गरिएको पचास हजार डलरमध्ये २५ हजार पाँच सय पचपन्न डलर गत नोभेम्बरमा हस्तान्तरण गरिएको थियो । शेर्पा किदुग अमेरिकाद्वारा प्रत्येक वर्ष मनाइने ‘ल्हाप्सो’ अर्थात सामुहिक देव पूजा कार्यक्रमको लागि स्तुपा निर्माण हुने जग्गा खरीद गरिएको थियो । 

 

सो जग्गामा किदुगले विश्व शान्ति र पर्यावरणीय स्थिरताको लागि बौद्ध चैत्य स्थापना गर्न लागेको हो । शेर्पा किदुगका महासचिव कर्म लामा, भाई तेन्डी लामा र बैनीहरु किन्जी शेर्पा र बिमला शेर्पाले दिवंगत पिता आङ् पासाङ् लामा र माता क्षोकी लामाको स्मरणमा सो दान गरेका हुन । 

 

लामा परिवारको तर्फबाट छोरा कर्म लामाले शेर्पा किदुगका अध्यक्ष उर्गेन शेर्पालाई पच्चीस हजार पाँच सय पच्पन्न डलरको चेक् हस्तान्तरण गरेका थिए । सोही अवसरमा बोल्दै किदुगका महासचिब समेत रहेका कर्म लामाले विश्व शान्ति र पर्यावरणका लागि दुरगामी प्रभाव पार्ने उक्त चैत्य निर्माणमा योगदान पुर्याउने अवसर पाउनुलाई आफ्नो परिवारको सौभाग्य सम्झेको बताए । 

 

भगवान बुद्धले दिएको शान्ति र करुणा शिक्षा आज युगमा अपरिहार्य देखिएको महसुस भएको हुनाले यस अभियानलाई साथ दिनको लागि समेत उनले सबैलाई आग्रह गरे । दानी परिवार प्रति धन्यवाद ज्ञापन गर्दै शेर्पा किदुगका अध्यक्ष उर्गेन शेर्पाले वहाँहरुको योगदान इतिहासमा अमिट छाप भएर रहने बताए । 

 

विश्व शान्ति र पर्यावरणीय स्थिरताका लागि स्थापित हुने यस स्तुपको प्रारम्भिक नक्सा तयार भइसकेको र पूर्ण परिमार्जित नक्सा चाँडै सार्वजनिक गरिने यसको लागि सबैलाई सहयोगको आव्हान पनि अध्यक्ष शेर्पाले गरेका छन ।