बाल्टिमोर (अमेरिका) – अमेरिकाको मेरिल्याण्ड जनरल एसेम्वलीका सभामुखको अफिसले डिष्ट्रिक–८ वाट निर्वाचित हयारी भण्डारीलाई सरकार सञ्चालन तथा स्वास्थ्य समिति (हेल्थ एण्ड गभरमेन्ट अपरेशन) गभमेको सदस्यमा नियुक्त गरेको छ । 

 

यो समितिले मेरिल्याण्ड राज्य सरकारको सञ्चालनको विभिन्न पाटाहरु तथा नागरिकको प्रत्यक्ष सरोकार भएको स्वास्थ्य सम्वन्धि कानून तर्जुमा र कार्यान्वयनमा महत्वपूर्ण भूमिका निर्वाह गर्दछ । हाउसमा पाँच वटा मुख्य कमिटिहरु हुन्छन् । त्यस मध्ये यो कमिटि मुख्य मानिन्छ । 

 

यो समितिले गर्ने अन्य कामहरुमा राज्य सरकारको निकायहरुको समन्वय र सञ्चालनमा हाउसले गर्ने विभिन्न कार्यहरुको लागि कानून बनाउन उक्त कमिटिले पास गरेपछि मात्र हाउसमा प्रवेश गरि आवश्यक प्रक्रिया पूरा गरि नीति नियम बन्नेछ । साथै उक्त समितिले प्रशासनिक कानून , खरीद, मानव संशाधन, रियल स्टेट तथा व्यक्तिगत सम्पत्ति सम्वन्धि कानून तर्जुमा गरी कार्यान्वयनमा पठाउने पनि गर्दछ ।

 

यसै गरि स्वास्थ्य सम्वन्धि सरोकार राख्ने  स्वास्थ्य सुविधा,उत्पादन र उपकरण ,दीर्घकालीन स्वास्थ्य सेवा,स्वास्थ्य विमा,स्वास्थ्यकर्मीहरुको सेवा, त्यस सम्वन्धि अनुसन्धान गर्ने निकायहरुलाई अनुगमन,समन्वय र सहयोग गर्ने सम्वन्धि कानुन समेत सोही समितिले गर्ने गर्दछ । 

 

स्मरणीय छ, स्वास्थ्य सम्वन्धि अध्ययन र अनुसन्धानमा मेरिल्याण्डका विश्वविद्यालय तथा स्वास्थ्य संस्थाहरु विश्व कै अग्रणी संस्थाको रुपमा लिईन्छ । मेरिल्याण्डमा ठूला ७० वटा विश्वविख्यात अस्पताल रहेका छन् । जसमध्ये जोन हपकिन्स विश्वविद्यालय विश्व कै उत्कृष्ट अनुसन्धान केन्द्र हो । यसमा नयाँ रोगको भ्याक्सिन र औषधिको आविष्कार गरिन्छ । ३६ जना नोवेल पुरस्कार प्राप्त चिकित्सकहरुले उक्त अस्पतालमा काम गरिसकेका छन् ।

 

भण्डारीले राज्यको महत्वपूर्ण कमिटिमा चयन भएपछि प्रतिक्रिया दिदै आफूलाई यसले जनताको जीवनमा परिवर्तन गर्ने काम गर्न थप उत्साहित बनाएको बताए। भण्डारीको शपथ ग्रहण जनवरी ९ तारिखमा मेरिल्याण्ड राज्यको राजधानी एनापोलिसमा हुँदैछ ।

 

साथै फ्रेण्डस अफ हयारी भण्डारीले आगामी जनवरी ६ तारिखमा एक कार्यक्रम गर्न लागेको जनाएको छ । यसमा सहभागिता जनाउन अनलाईन मार्फत नाम दर्ता गराउन गर्नुपर्नेछ ।