चितवन । चितवन प्रहरीले अदालतबाट सजाय पाएर फरार रहेका व्यक्तिहरु खोजी गर्न आकस्मिक चेक जाँच सञ्चालन गरेको छ ।
पछिल्लो समय विभिन्न आपराधिक क्रियाकलापमा संलग्न व्यक्ति जिल्लाबाट पक्राउ पर्न थालेपछि चितवन प्रहरीले आकस्मिक चेक जाँच सञ्चालन गरेको हो ।
चितवन पछिल्लो समय आपराधिक क्रियाकलाप गर्ने व्यक्तिहरुको अखडाको रुपमा देखिन थालेको छ । अपराधीले राजधानीलगायत अन्य जिल्लामा आपराधिक क्रियाकलापमा संलग्न हुने र चितवनलाई लुक्ने ठाउँका रुपमा प्रयोग गर्दै आएका छन् ।
चितवन प्रहरीले हरेक दिन जिल्लाका १३ ठाउँमा चेक जाँच गर्ने गरेको नायब प्रहरी उपरीक्षक (डीएसपी) प्रभुप्रसाद ढकालले बताए । साना हातहतियार तथा लागुऔषध बोकेर हिँड्ने व्यक्तिलाई केन्द्रित गरी चेकजाँचलाई कडा परिएको उनले बताए ।
गत कात्तिकमा डीएसपी ढकालको संयोजकत्वमा चितवन प्रहरीले ‘प्रोसेफनल स्टार्डड टिम’ गठन गरेको थियो । नेपाल प्रहरीको आन्तरिक सुदृढीकरण अभियानअन्तर्गत जिल्ला प्रहरी कार्यालय चितवन र मातहतका प्रहरी कार्यालयहरुबाट सम्पादन भइरहेका कार्यहरुलाई अझ बढी चुस्त, दुरुस्त र प्रभावकारी एवम् नतिजामूलक बनाउन टिम गठन गरिएको हो ।
डीएसपी ढकालका अनुसार प्रोसेफनल स्टार्डड टिमले प्रहरी कार्य, अपराध रोकथाम तथा अनुसन्धान, ट्राफिक व्यवस्थापन, कार्यालय व्यवस्थापन तथा अन्य प्रहरी सेवालाई अझ प्रभावकारी बनाउन प्रत्यक्ष र अप्रत्यक्ष रुपमा अनुगमन तथा निरीक्षण गर्ने तथा आवश्यकताअनुसार निर्देशन दिने, समन्वय गर्ने र कारबाहीको लागि कार्यालय प्रमुख समक्ष सिफारिस गर्नेसम्मको कामहरु गर्दै आइरहेको छ ।
प्रहरीको काम कारबाहीलाई प्रभावकारी बनाउन हाल भइरहेका कमी–कमजोरी पत्ता लगाउने र त्यसको समाधानका उपायहरुसहित कार्य सम्पादनलाई उच्चस्तरको बनाउन यसले सहयोग गर्ने डीएसपी ढकालले बताए ।
प्रतिक्रिया