हिमालयखवर संवाददाता
अमेरिका– गैर आवासीय नेपाल संघ अमेरिका (एनआरएन अमेरिका) मा आगामी नेतृत्वका लागि चुनावी माहौल तातेपनि भोट दिनका लागि सदस्यता लिन भने कसैको चासो देखिदैंन ।
सोमबार साँझसम्म एनआरएन अमेरिकाको सदस्य लिनेको सङ्ख्या ५ सय पनि पुगेको छैन । एनआरएन अमेरिकाको आधिकारिक वेभसाइटमा उल्लेख भएअनुसार अहिलेसम्म एनआरएन अमेरिकामा ३ सय ६९ जना साधारण र ९४ जना आजिवन गरी जम्मा ४ सय ६३ मात्र सदस्य भएका छन् । यदि अहिले नयाँ नेतृत्वका लागि निर्वाचन गर्ने हो भने भोट हाल्न पाउने ४ सय ६३ जना मात्र हुन् । यसरी सदस्यका लागि फारम भर्ने पनि सदस्य बन्न योग्य छन् वा छैनन् छानविन हुन बाँकी छ । अव सदस्य बन्न करिब २ साता मात्र बाँकी छ ।
दुई वर्ष अघि एनआरएन अमेरिकामा १० हजार भन्दा बढी सदस्य भएका थिए । यी सदस्यले अनलाइन भोट मार्फत वर्तमान नेतृत्व चयन गरेका हुन् । एनआरएन अमेरिकाको नेतृत्वमा जान भने अहिले उम्मेदवारी घोषणा गर्ने होडबाजी नै चलेको छ ।
टेक्सासवाट अध्यक्षका लागि राम सी पोखरेल र गौरी जोशीले उम्मेदवारी घोषणा गरेका छन् । वर्तमान अध्यक्ष डा केशव पौडेलपनि पुन दोहोर्याउने पक्षमा छन् । वरिष्ठ उपाध्यक्ष कृष्ण पोखरेल र उपाध्यक्ष रविना थापाले पनि अध्यक्षमा उम्मेदवारी घोषणा गरेका छन् । अन्य पदहरुमा पनि विभिन्न आंकाक्षीहरुले आफू उठ्ने सोसल मिडिया मार्फत जानकारी दिइरहेका छन् । निर्वाचन समितिले निर्वाचन कार्यक्रम अहिलेसम्म सार्वजनिक गरेको छैन । तर, २ महिना पछि मे महिनामा चुनाव हुने बताइएको छ ।
नेपाली समुदायको सङ्ख्या करिब ५० हजार रहेको वताईने न्युयोर्कबाट सदस्य वन्नेको सङ्ख्या जम्मा ७३ मात्र छ । यस्तै नेपालीको ठुलो समुदाय रहेको टेक्ससमा पनि यस्तै जम्मा ७३ जनाले मात्र सदस्य भएको देखिन्छ । अर्को नेपालीहरूको धेरै बस्ती रहेको सहरमा पर्ने कोलोरोडोमा भने जम्मा २५ जना सदस्य छन् । सदस्य सङ्ख्या न्यून भएपछि एनआरएन अमेरिकाले विभिन्न राज्यमा सदस्यता विस्तार अभियान सुरु गर्ने जनाएको छ । एनआरएन च्याप्टरको संयोजनमा सदस्यता विस्तार अभियान चलाइने बताइएको छ ।
निर्वाचनको माहौल तातिरहेकाले सदस्य बन्ने क्रम आउने दिनमा ह्वात्तै बढ्ने एनआरएनका पदाधिकारीहरू बताउँछन् । अव केही दिनमा ह्वात्तै वढ्छ र यो १० हजार भन्दा कम हुदैंन् एक पदाधिकारीले हिमालयखवरलाई भने ।
अन्तिम समयमा बन्ने सदस्यको छानविन कसरी गर्ने यो सबैभन्दा ठुलो चुनौती हो । भोटका लागि विभिन्न नाममा सदस्यता बनाइएको वर्तमान कार्यसमितिलाई आरोप छ । एनआरएन अमेरिकाले केही साता अघि साधारण सभामा सार्वजनिक गरेको प्रतिवेदनमा अमेरिकामा नेपालीको सङ्ख्या करिब २ लाख ५० हजार रहेको उल्लेख छ ।
अमेरिकाको जनगणनामा नेपालीको सङ्ख्या करिब ७० हजार रहेको तथ्याङ्क छ । मेरिल्याण्डमा मात्र १३ हजार भन्दा बढी नेपाली बसोबास गर्ने जनगणनामा देखिएको थियो ।
प्रतिक्रिया