काठमाडौँ । नेपालमा सोमबार थप ९२७१ जनामा कोरोना भाइरस संक्रमण पुष्टि भएको छ । गत चौबीसघन्टामा १७ हजार ६२३ जनाको पिसिआर परीक्षणका क्रममा ९११७ जना र एन्टिजोन परीक्षणमा ७८८ गरी ९२७१ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । 

 

यस्तै, नेपालमा थप १३९ जनाको निधन भएको मन्त्रालयले जनाएको छ । यसमा नेपाली सेनाले गरेको शव व्यवस्थापनको तथ्यांकसमेत समावेश गरिएको मन्त्रालयको भनाइ छ । यसैबीच, आइतबार ८८ जनाको मृत्यु भएको थियो । नेपालमा पछिल्लो समय दोस्रो भेरियन्टको कोरोना संक्रमण व्यापक भएसँग मृत्यु हुनेको संख्या पनि निरन्तर बढ्दो क्रममा रहेको छ । नेपालमा कोरोना संक्रमणका कारण निधन हुनेको संख्या ३८५९ पुगेको छ । 

 

यसैगरी, पछिल्लो चौबीसघन्टामा ४००७ जना संक्रमणमुक्त भएका छन् । योसहित हालसम्म ७५. ९८ प्रतिशत अर्थात् ३ लाख ६ हजार ७९४ जना संक्रमणमुक्त रहेको मन्त्रालयले जनाएको छ । सोमबारसम्म देशभर ९३ हजार १४१ जना सक्रिय संक्रमित रहेका छन् । जसमध्ये ६७१५ जना संस्थागत आइसोलेसन र ५६ हजार ४२६ जना होम आइसोलेसनमा रहेका छन् । यस्तै, आइसियूमा उपचाररत ९१० जना र २९५ जनाको भेन्टिलेटरमा उपचार भइरहेको मन्त्रालयले जनाएको छ । मन्त्रालयले दिएको जानकारीअनुसार देशभरका क्वारेन्टाइनमा ४२७ जना रहेका छन् । ु

 

यसैबीच, काठमाडौँ उपत्यकामा ३६०७ जना कोरोना संक्रमित थपिएकोमा काठमाडौँका २७७५, ललितपुरका ५०५ र भक्तपुरका ३२७ जना रहेका छन् ।

 

स्वास्थ्य तथा जनसंख्या मन्त्रालयले दिएको जानकारीअनुसार रुपन्देहीमा ५३०, कास्कीमा ४७३, मोरङमा ३९९, कञ्चनपुरमा ३९५, चितवनमा ३९२, कैलालीमा ३४०, बाँकेमा २९५, दाङमा २४६ तथा मकवानपुरमा २३८ जना संक्रमित थपिएका छन् । यस्तै, झापामा १५४, पर्सामा १४४, धनुषामा १४४, काभ्रेमा १२७, कपिलवस्तुमा ११५ तथा पाल्पामा १०८ जनामा संक्रमण पुष्टि भएको मन्त्रालयले जनाएको छ ।