ड्यालस (टेक्सस) । नेपाली समाज टेक्ससको भोली शनिबार हुने निर्वाचनको तयारी पुरा भएको छ ।

निर्वाचन आयोगका पदाधिकारीहरु, नेपाली समाज टेक्ससका पदाधिकारीहरु शुक्रबार अबेरसम्म चुनावी प्रकृयाको तयारीको लागि व्यस्त थिए । शनिबार बिहान ८ बजेदेखि मतदान सुरु हुने र साँझ ७ बजेभित्र चुनावस्थलमा प्रवेश गर्नेले मतदान गर्न पाउने निर्वाचन आयुक्त विजयराज भट्टराईले जानकारी दिए ।

एकैपटकमा २५ जनाले मतदान गर्न सक्नेगरि बुथहरुको व्यबस्था गरिएको छ । एकजनाले मतदान गर्न बढीमा डेढ मिनेटमात्र लाग्ने समेत भट्टराईले बताए । मतदान केन्द्रमा पसेपछि दुई मिनेटमित्र बाहिर निस्कन मिल्नेगरि छिटो गतिमा हुने व्यबस्था गरेको समेत उनले उल्लेख गरे ।

नेपाली समाज टेक्ससमा ६ हजार एकसय सदस्यहरु छन् । विगतको ट्रेण्ड हेर्दा ६० देखि ६७ प्रतिशतसम्म मतदान हुने गरेको छ । त्यस हिसाबले सहजै चुनाव गर्न सकिने विश्वासमा आयोगका पदाधिकारीहरु छन् ।

नेपाली समाज टेक्ससको नेतृत्व चयनका हुने निर्वाचनमा दिनभरि लाग्छ भन्ने बाहिर चर्चा चलेजस्तो होइन । हामीले छिटो हुनेगरि धेरै कामहरु गरिसकेका छौं अर्का आयुक्त बेदराज बस्नेतले भने । प्रमुख आयुक्त महेश नेपालले चुनाव सभ्य रुपमा सम्पन्न गर्न मतदाता सदस्यहरु, उम्मेदवार, स्वयमसेवकहरुबाट सहयोगको अपेक्षा राखिएको समेत उनले उल्लेख गरे ।

युलेसस्थित पशुपतिनाथ मन्दिरमा हुने चुनावले मन्दिरका पूजा, गतिविधि भने नियमित हुनेछन् । मन्दिरको पूजाका लागि उत्तरतर्फको गेट खोल्ने व्यबस्था गरिएको छ ।

भोलीको चुनावका लागि १६ पदमा ३३ जना उम्मेदवारहरु प्रतिस्पर्धामा छन् । अध्यक्षमा विजय भुसाल र जनक भण्डारी टीम सहित प्रतिस्पर्धामा छन् । वरिष्ठ उपाध्यक्षमा जीवलाल भुसाल र चण्डी भण्डारी प्रतिस्पर्धामा छन् भने महासचिवमा प्रविश श्रेष्ठ र रामकृष्ण यादव छन् ।

गैर प्यानलबाट सदस्य पदमा एकमात्र उम्मेदवार हेम भट्ट उम्मेदवार रहेका छन् ।

शनिबारको निर्वाचनमा दुई वठा मतपत्रहरु हुनेछन् । नेपाली समाज टेक्ससका अध्यक्ष राजेन्द्र वाग्लेले एउटा मतपत्रमा उम्मदवारहरुका नाम हुनेछ भने अर्काे मतपत्रमा विधानका केही व्यबस्थाहरु परिवर्तन गर्नका लागि सदस्यहरुको रायका लागि मत संकलन गर्न लागिएको हो । विधानको परिवर्तीत व्यबस्थालाई समर्थन गर्नका लागि हो भन्नेमा रेजा लगाउने र समर्थन नगर्नका लागि होइन भन्नेमा रेजा लगाउनुपर्ने समेत उनले बताए ।

नेपाली समाज टेक्ससको इतिहासमा विधानमा परिवर्तन गर्नका लागि यसप्रकासको चुनावी प्रकृयालाई अवलम्वन गरिएको यो पहिलो पटक हो ।