ड्यालस (अमेरिका) । नेपाली समुदायद्वारा टेक्ससको ड्यालस फोर्टवर्थ मेट्रोप्लेक्समा निर्माण सुरु भएको पशुपतिनाथ मन्दिर र बुद्ध बिहार (स्तुपा) का लागि एक करोड १२ लाख डलरको अनुमान गरिएको छ ।

दोस्रो र तेस्रो चरणमा निर्माण हुने बुद्ध बिहार र पशुपतिनाथ मन्दिरका लागि उक्त रकमको अनुमान गरिएको हो । शनिबार चन्दादाताहरुको सम्मानमा आयोजना गरिएको कार्यक्रममा योजना समितिका संयोजक निरज श्रेष्ठले अनुमानित बजेटको आधा रकम नभएसम्म सुरुवात गर्न अप्ठेरो रहेको हुँदा सबै नेपाली समुदायलाई यो अभियानमा जोडिन आव्हान गरे ।

पहिलो चरणको निर्माण सम्पन्न भएर अहिले एकै भवनबाट पशुपतिनाथ र बुद्ध बिहार सञ्चालन हुँदै आएको छ । दोस्रो र तेस्रो चरण पुरा भएपछि बुद्ध बिहार र पशुपतिनाथका अलग्गै भवन, संरचनाहरु हुनेछन् । काठमाडौंको पशुपतिनाथकै आकार, प्रकारको मन्दिर निर्माण गर्नका लागि पुरातात्विक आर्किटेक्टहरुसँग धेरैपटक छलफल भैसकेको छ ।

बुद्ध बिहारको आकार, प्रकार समेत स्वयम्भू स्तुपाकै जस्तो हुने बताइएको छ । पशुपतिनाथ मन्दिरको लागि मात्र ५५ लाख डलर बजेट अनुमान गरिएको छ । स्तुपाको निम्ति तीनलाख डलर अनुमान गरिएको छ ।

‘हामीसँग अब बुद्ध बिहार र पशुपतिनाथ मन्दिर निर्माणको लागि पूर्वाधार तयारी अवस्थामा छ । सबै नेपालीले मन खोलेर सहयोग गर्ने हो भने केही वर्षभित्रै भव्य मन्दिर र बिहार बनाउन सक्छौँ’ श्रेष्ठले भने । आवश्यक बजेट नभएकोले मन्दिर र स्तुपा (बिहार) एकै पटक निर्माण गर्न कठिनाई भएपछि समितिले सुरुमा स्तुपा (बिहार) को निर्माण गर्ने विषयमा छलफल अघि बढाइरहेको छ ।

शनिबारसम्म मन्दिरलाई सहयोग गरेर अनरेवल ट्रष्टी बनेका २२ परिवार, ट्रष्टी १८ परिवार, पारिवारिक प्याट्रोन ८ परिवार, अनरेवल फाउण्डिंग मेम्बर ७६ परिवार र फाउण्डिङ्ग मेम्बर परिवार ९१ लाई सम्मान गरिएको थियो ।

ड्यालस फोर्टवर्थ मेट्रोप्लेक्समा मात्र झण्डै ८० हजार नेपालीको बसोबास रहेको अनुमान छ । नेपाली समुदायले गौरब गर्ने गरि डिजाइन र पूर्वाधारमा निर्माण हुन लागेको मेडिटेसन हल सहितको स्तुपा र पशुपतिनाथ मन्दिरका लागि सबै परिवार जोेडिनका लागि नेपाली सांस्कृतिक तथा आध्यात्मिक केन्द्रले आव्हान गरेको छ ।

‘आजका दिनसम्म चन्दा दिएर मन्दिरमा जोडिनुभएका तपाईहरु सबैजना मन्दिरका प्रतिनिधिहरु हुनुहुन्छ । आफ्नो टोल छिमेक, आफन्तहरुलाई समेत यो अभियानमा जोड्न र समावेश गराउनका लागि तपाईहरु सबैको सहयोग अपेक्षा गरेका छौं’ मन्दिर बोर्ड अफ ट्रष्टीका अध्यक्ष डा. प्रेम अधिकारीले कार्यक्रममा आव्हान गरे ।

जतिसक्दो चाँडो निर्माण गर्न सकियो लागत उतिनै कम पर्ने भएकोले नेपाली समुदायलाई जोडिन आग्रह गरिएको छ । एकै पटक रकम तिरेर सदस्य हुन कठिनाई महसुस गर्नेहरुका लागि किस्तावन्दीमा समेत तिर्न सकिने सुविधा मन्दिरले प्रदान गरेको छ ।

शनिबार मन्दिरका लागि एकलाख डलर भन्दा बढी दान गरेर वाल अफ अनर सम्मान दुईजनालाई प्रदान गरिएको थियो । टेक्ससका व्यवसायी नरेशराज पाण्डे र शैलेन्द्र मानन्धरले एकलाख डलर भन्दा बढी दान गरिसकेका छन् ।

सो अवसरमा नेपाली समाज टेक्ससका अध्यक्ष राजेन्द्र वाग्ले, नेपाली सांस्कृतिक तथा आध्यात्मिक केन्द्रकी अध्यक्ष सीता सापकोटा, सूचना प्रविधि संयोजक जीवन घिमिरे लगायतले मन्दिरका भावी योजना तथा कार्यक्रमका बारेमा प्रकाश पारेका थिए ।

घिमिरेले मन्दिरलाई सहयोग गरेर सदस्यता लिनेहरुको सुविधाका लागि अनलाइन पोर्टलबाटै सबै व्यवस्था गर्न लागिएको जानकारी दिए । मन्दिरको जुनसुकै प्रकारको सदस्य हुनका लागि मन्दिरको वेवसाइटमै व्यबस्था हुन लागेको र क्रेडिट कार्ड, डेबिट कार्डबाट किस्तावन्दीमा तिर्न सकिने व्यबस्था समेत हुन लागेको समेत घिमिरेले जानकारी दिए ।

शनिबारको कार्यक्रममा मन्दिर तथा बिहारको लागि तीनहजार पाँचसय डलरदेखि एकलाख डलरसम्म सहयोग गर्नेहरुलाई सम्मान गरिएको थियो ।