ड्यालस (अमेरिका) । नेपालको सुदुर पश्चिममा मनाइने एक प्रमुख गौरापर्व टेक्ससमा आउँदो अगष्ट २५ तारिक ड्यालसमा भव्य रुपमा मनाउने तयारी सुरु भएको छ ।

सुदुर पश्चिम नेपाली समाजको आयोजनामा अगष्ट २५, आइतबार युलेसस्थित पशुपतिनाथ तथा बुद्ध मन्दिरमा मेगा गौरापर्व मनाउन लागिएको समाजकी सचिव गुञ्जन भण्डारीले जानकारी दिइन् । समाजले हरेक वर्ष गौरापर्वलाई मौलिक पर्वका रुपमा विशेष रुपमा मनाउँदै आएको छ ।

कार्यक्रममा छलिया नाच, सुदुरपश्चिमको पञ्चेबाजा, देउडा नाच, हुड्केली नाच, गौरा नाच, सुदुरपश्चिम नाच लगायतका विशेष प्रस्तुतिहरु हुनेछन् । त्यस अवसरमा विशेष आकर्षणका रुपमा प्रख्यात देउडा गायक नन्दकृष्ण जोशी, शंकर सिंह विष्टको समेत सहभागिता रहने बताइएको छ ।

सुदुरपश्चिममा भाद्र कृष्णको षष्टीदेखि मनाउन सुरु हुने गौरा पर्व त्यस क्षेत्रको सबैभन्दा महत्वपूर्ण चाड हो । अगष्ट २५ तारिक गौरापर्वका उपस्थित हुन समाजले समस्त नेपालीहरुमा अपिल गरेको छ ।

त्यसैगरि टेक्ससको राजधानी शहर अस्टिनमा रहेका नेपालीहरूले पनि गाैरापर्व मनाउने भएका छन् । अस्टिनमा रहेका सुदुरपश्चिमेली नेपालीहरूले अगष्ट २३ तारिक शुक्रबार गाैरापर्व मनाउने निधो गरेका छन् ।

उनीहरूले हुट्टोस्थित पशुपतिनाथ मन्दिरमा भेला भएर गाैरापर्व मनाउने तयारी गरेका छन् ।