चितवन । पूर्वी चितवनको रत्ननगर नगरपालिकामा दुई जना विद्यार्थीले एसइई परीक्षामा चार जिपिए ल्याएका छन् । संस्थागत विद्यालयका दुई जनाले चार जिपिए ल्याउँदा रत्ननगरका सामुदायिक विद्यालयतर्फ कुनै पनि विद्यार्थीले चार जिपिए ल्याउन सकेनन् ।

संस्थागततर्फ स्काइराइडर आवासीय माविका संयोग देवकोटा र पञ्चकन्या विद्या मन्दिरका कुशल पाण्डेले चार जिपिए ल्याएका हुन् । चितवनमा ५६ प्रतिशत विद्यार्थी उत्तीर्ण हुँदा १६ जनाले मात्र चार जिपिए ल्याएका छन् । चितवनमा ४ जिपिए ल्याउने विद्यालयमा संस्थागत विद्यालय बढी छन् ।

९ वटा संस्थागत विद्यालयका विद्यार्थीले ४ जिपिए ल्याउँदा सामुदायिकतर्फका २ वटा विद्यालयका विद्यार्थीले मात्र ४ जिपिए ल्याएका छन् । सामुदायिक विद्यालयतर्फ चितवन माध्यमिक विद्यालय र बालकुमारी कन्या माध्यमिक विद्यालयका विद्यार्थीले मात्र ४ जिपिए ल्याएका छन् ।

संस्थागत विद्यालयतर्फ डेजी सेकेण्डरी इङ्लिस स्कुल खैरहनी, नारायणी पब्लिक इङ्लिस स्कुल भरतपुर, लिटिल फ्लावर इङ्लिस स्कुल, अर्किड इङ्लिस स्कुल र स्मल हेभन मोडेल स्कुलबाट समान दुई/दुई जना विद्यार्थीले ४ जिपिए ल्याएका छन् ।

यस्तै, पञ्चकन्या विद्यामन्दिर र स्काइराइडरसहित पोलार स्टार र अरोमा माध्यमिक विद्यालयबाट समान एक/एक जनाले ४ जिपिए ल्याएका हुन । जिल्लाबाट १० हजार ८ सय ३२ जना विद्यार्थीले परीक्षा दिएकोमा छ हजार ४१ जना विद्यार्थी उत्तीण भएका छन् ।

यस्तै, जिल्लामा ‘ए’ प्लस ल्याउने विद्यार्थीको संख्या १ हजार ६ सय ९२ रहेको छ । ‘ए’ ग्रेड ल्याउनेको संख्या १ हजार ९ सय ९९ रहेको छ । जिल्लामा यस वर्ष ६ हजार ४१ जना विद्यार्थी अनुत्तीर्ण भएका छन् ।