ड्यालस (टेक्सस) । टेक्ससको युलेसमा नेपालीमुलका चिकित्सक तथा स्वास्थकर्मीहरुको पहलमा स्थापित हिमालय हेल्थ क्लिनिकले आइतबारदेखि सेवा सुरु गरेको छ ।

युलेसको नयाँ मन्दिर भवनमा रहेका सुविधासम्पन्न कोठाहरुबाट पहिलोपटक क्लिनिक सुरु भएको हो । मन्दिरको पाँचवठा सुविधासम्पन्न कोठाहरु हिमालय हेल्थ क्लिनिकले प्रयोग गर्ने सम्झौता भएको छ ।

यो निशुल्क क्लिनिक हो । आइतबार पहिलो पटक सञ्चालन भएको क्लिनिकमा ९५ जनाको स्वास्थ परिक्षण लगायतका सेवाहरु दिइएको थियो । क्लिनिकमा डा.सञ्जीब श्रेष्ठ, डा.दिपेश बिष्ट, डा.बिष्णु सापकोटा, डा.रजनी श्रेष्ठ, डा. रोजी राजभण्डारी, डा. अनुज कँडेल, डा. विश्वास उपाध्याय, डा. शर्मिला श्रेष्ठ, डा. पूजा सैँजु लगायतबाट सेवा प्रदान भएको थियो ।

क्लिनिकमा झण्डै डेढ दर्जन नेपाली समुदायका नर्सहरु, स्वयम्सेवकहरुले सेवा दिएका थिए ।

पहिलो दिन भएको र सबै पुर्वाधारहरु भएकोले आइतबार हिमालय हेल्थ क्लिनिकका चिकित्सक तथा नर्सहरु निकै उत्साहित थिए ।

भविष्यमा क्लिनिक हरेक आइतबार सञ्चालन गर्ने योजना भएपनि अहिले जनशक्तिका कारण एक हप्ता बिराएर गर्ने योजनामा क्लिनिक रहेको छ । विशेषगरि स्वास्थबीमा नभएका र नेपालबाट भ्रमणका लागि आएकाहरुका निम्ति क्लिनिक विशेष उपयोगी हुने अनुमान गरिएको छ ।

आउँदो क्लिनिक जुन ४ तारिक आइतबार गर्ने तयारी रहेको क्लिनिकका एक्जुकेटिभ डाइरेक्टर राज श्रेष्ठले जानकारी दिएका छन् ।