अमेरिका । आईटी कम्पनी र क्रिप्टोकरेन्सीमा लगानी गरेको अमेरिकाको २० ठुला बैंक भित्र पर्ने सिलिकन भ्याली बैंक शुक्रवार टाट उल्टिएको छ ।

बचतकर्ताको पैसा फिर्ता गर्न नसकेपछि यो बैंकलाई अमेरिकाको सरकारी निकाय फेडरल डिपोजिट इन्सुरेन्स कर्पोरेशनले नियन्त्रणमा लिएको छ ।

अमेरिकाको वित्तीय इतिहासमा टाट उल्टिने बैंक मध्ये यो दोस्रो ठुलो संस्था हो ।

अमेरिकाको अर्थतन्त्र अहिले अन्यौलमा छ । उपभोग्य वस्तुको मूल्य उच्च छ । ब्याजदर निकै माथि पुगेको छ । ब्याजदर उच्च हुँदा पनि महंगी तल झरेको छैन । तर, रोजगारीका अवसर भने बढीरहेका छन् । सूचना प्रविधिको क्षेत्रमा भने संकुचन आएको छ ।

शुक्रवार सिलिकन भ्याली बैंक टाट उल्टिएको समाचार आए लगत्तै अन्य वित्तीय संस्थाको शेयर मूल्य पनि तल झर्न थालेको थियो । यसको असर कति गहिरो हुन्छ भन्ने सोमवार शेयर बजार खुलेपछि देखिने छ ।

तर, यो बैंक टाट उल्टिएकाले अमेरिकाको शेयर बजार रहेको वाल स्ट्रिटमा भने हलचल देखिएको छ ।

सन् १९८३ मा स्थापना भएको सिलिकन भ्याली बैंकको गत बर्षसम्मको कुल सम्पत्ति २०९ अर्व डलर रहेको थियो ।

अमेरिकामा ब्याजदर उच्च हुदैं गएपछि आईटी कम्पनीहरुले थप पूँजी जुटाउन सकेका छैनन । यसको असरले यो बैंकले पूँजी संकलन गर्न सकेको थिएन ।

क्रिप्टोकरेन्सीको मूल्य पनि घटेको छ । विट्क्वाइन, इथेरियम जस्ता चर्चित क्रिप्टोकरेन्सीको मूल्य उच्च तहवाट निकै तल झरेर केही समय देखि स्थिर रहेको छ । क्रिप्टोकरेन्सी बजारमा एक पछि अर्को नकरात्मक समाचारहरु आईरहेका छन् ।

यस अघि सन् २००८ मा वासिंगटन म्युचुअल कम्पनी असफल भएको थियो । त्यसवेला अमेरिकामा गहिरो आर्थिक संकट आएको थियो ।

अमेरिकामा २ लाख ५० हजार डलरसम्मको निक्षेपको बिमा हुन्छ । यसले गर्दा साना वचतकर्ताको पैसा भने पुरा फिर्ता हुन्छ । सिलिकन भ्याली बैंकमा आईटी क्षेत्रका केही ठुला कम्पनीका पनि खाता रहेकाले उनीहरुको व्यवसाय के हुन्छ भन्ने प्रश्न भने उठेको छ ।

अमेरिकामा ठुलो देखि स्थानिय स्तरमा स सानो कारोवार गर्ने सम्मका बैंक हुन्छ । स साना बैंक खुल्ने र बन्द हुने नयां भने मानिदैंन । तर, सिलिकन भ्याली बैंक ठुलो मध्येमा पर्ने भएकाले यसले वित्तीय बजारमा तरंग ल्याएको हो ।