चितवन । देशमा व्याप्त भ्रष्टाचार, लुटतन्त्र र अनियमितताका विरुद्ध खरोरुपमा प्रस्तुत हुँदै आएका ‘नेपालका लागि नेपाली’ अभियानका अभियन्ता ज्ञानेन्द्र शाहीमाथि मरणासन्न हुने गरी आक्रमण भएको छ । 

 

भ्रष्टाचार र लुटतन्त्रविरुद्ध नागरिक खबरदारी कार्यक्रममा सहभागी हुन चितवन आएका शाहीलाई नेकपाका कार्यकर्ताहरुले रड, ढुंगा र इँटा प्रहार गरी आक्रमण गरेका हुन् । 

 

भरतपुर १० चौबीसकोठीस्थित होटल ग्लोबलमा पार्किङ गरी राखिएको ना ३ ख ८४५८ नम्बरको माइक्रो बसभित्र बस्दै गरेको अवस्थामा शाहीलाई नियोजितरुपमै मरणासन्न हुने गरी कुटपिट भएको हो । 

 

आक्रमण भएको केही समयपछि घटनास्थलमा पुगेको प्रहरीले शाहीलाई उद्धार गरेको थियो । कुटाइबाट शाहीसहित दुई अभियन्ता घाइते भएका छन् । 

 

आक्रमणमा परी टाउको र हातमा गम्भीर चोट लागेका शाहीलाई चितवन मेडिकल कलेज लगिएको थियो । अस्पतालले थप उपचारका लागि काठमाडौँ रेफर गरेको छ । 

 

घटनामा संलग्न भनिएका एक जनालाई पक्राउ गरिएको जिल्ला प्रहरी कार्यालय चितवनका प्रहरी नायब उपरीक्षक एकनारायण कोइरालाले बताए । प्रहरीका अनुसार अन्य आक्रमणकारीको खोजी कार्य भइरहेको छ । 

 

प्रहरीले शाहीलाई अज्ञात समूहले आक्रमण गरेको जनाएको छ । चौबीसकोठीमा आयोजित खबरदारी कार्यक्रममा नेकपाका कार्यकर्ताहरुले हस्तक्षेप गरेका थिए । उनीहरुले शाहीविरुद्ध चर्को नाराबाजीसमेत गरेका थिए । खबरदारी सभाको माहोल बिग्रिएपछि प्रहरीले नै दुवै समूहलाई तितरबितर पारेको थियो । 

 

‘नेपालका लागि नेपाली’ अभियानका सदस्य अनिल शाहीले शान्तिपूर्ण कार्यक्रममाथि नेकपाका कार्यकर्ता र प्रहरीले हस्तक्षेप गरेको बताएका छन् । वर्तमान कम्युनिस्ट सरकारले वाक स्वतन्त्रतालाई कुण्ठित पार्ने काम गरेको र शान्तिपूर्णरुपमा भ्रष्टाचार र लुटतन्त्रविरुद्ध खबरदारी गर्दा सरकार तर्सिएको भन्दै अभियन्ताहरुले आक्रोश पोखेका छन् ।