चितवन । स्थानीय तहको चुनावका क्रममा भरतपुर महानगरको मतगणना भइरहेका बेला वडा नं १९ को मतगणना सकिनै लाग्दा मतपत्र च्यात्ने कार्यमा संलग्न माओवादी केन्द्रका प्रतिनिधि मधुकर न्यौपाने र द्रोणबाबु सिवाकोटीलाई चितवन अदालतले एक÷एक लाख रुपैयाँ जरिवाना हुने फैसला गरेको छ ।
गत जेठ ३० गतेको इजलासले असार ५ गतेको लागि सजाय मिति तोकिए पनि न्यायाधीश बिदामा बस्दा मिति सरेको थियो । मुद्दा फैसला र सजाय निर्धारण भएपछि मतपत्र च्यातेको घटनाको अदालतबाट किनारा लागेको छ ।
मतगणना भइरहेको अवस्थामा मतपत्र नै च्यात्ने र जबर्जस्ती गर्नेलाई एकलाख रुपैयाँ जरिवाना र दुई वर्षसम्म कैद वा दुवै सजाय हुन सक्ने कानुनी व्यवस्था रहेकोमा उनीहरुलाई एक÷एक लाख जरिवानामात्रै तोकिएको चितवन अदालतले जनाएको छ ।
भरतपुर महानगरपालिका वडा नं १९ को मतगणना जारी रहेको बेला माओवादीका कार्यकर्ताले मतपत्र च्यातेपछि यो विवाद सर्वाेच्चसम्म पुगेको थियो । महानगरका २९ वडामध्ये २७ वटाको गणना सम्पन्न भएको अवस्थामा मतपत्र त्यातिएको थियो ।
वडा नं २० को मतगणना हुनै बाँकी थियो । १९ नं वडाको जम्मा मत २८९७ रहेकोमा गणना भइसकेको १८०९ मत र गणना हुन बाँकी ९९८ मतमध्ये क्षति भएको ९० मतपत्र थियो ।
०७४ जेठ १६ गते जिल्ला प्रहरी कार्यालय चितवनले मतपत्र च्यातेको आरोपमा पक्राउ गरेको दुई जनाविरुद्ध मुद्दा दर्ता गरेको छ । निर्वाचन (कसुर तथा सजाय) ऐन, २०७३ अनुसार मुद्दा दर्ता गरिएको थियो । सोही दिन अदालतबाट ७ दिनको म्याद थप भएको थियो ।
घटनापछि मतगणना स्थल कभर्डहलको भवनको गेटमा निर्वाचन कार्यालय र मतगणनाको माग गर्दै आएको तत्कालीन नेकपा एमालेले छुट्टाछुट्टै ताला लगाएको थियो । ०७४ वैशाख ३१ भएको निर्वाचनअन्तर्गत जेठ १४ गते राति भरतपुर महानगरपालिका–१९ को मतगणनाको क्रममा मतपत्र च्यातेको आरोपमा मुद्दा चलेका भरतपुर महानगर ११ का वर्ष ४० का द्रोणबाबु सिवाकोटी र भरतपुर महानगर वडा नं १ का ३५ वर्षीय मधु न्यौपानेलाई दोषी ठहर गरेको थियो ।
प्रतिक्रिया