काठमाडौँ । चार वर्षदेखि सम्पर्कविहीन गंगामाया अधिकारीका जेठा छोरा नूरप्रसाद अधिकारी परिवारको सम्पर्कमा आएका छन् ।
कान्छा छोरा कृष्णप्रसादको हत्यारालाई कारबाहीको माग गर्दै गंगामाया लामो समयदेखि आमरण अनशनमा थिइन् । आमा अनशनमै रहेका बेला पनि सम्पर्कमा नआएका नूरप्रसादलाई चार वर्षपछि आइतबार प्रहरीले समातेर परिवारको सम्पर्कमा ल्याएको हो । गंगामायाकै आग्रहमा उनलाई पक्रेर ल्याएको प्रहरीले जनाएको छ ।
अपराध महाशाखाका एसएसपी धीरप्रताप सिंहका अनुसार नुरप्रसाद ४ वर्षदेखि परिवारको सम्पर्कमा नभएको र आमा गंगामायाको आग्रहमा खोजी गरिएको हो । पारिवारिक विवाद भएपछि उनी परिवारबाट टाढिएको बुझिएको एसएसपी सिंहले बताए । नूरप्रसादलाई परिवारको जिम्मा लगाउन लागिएको सिंहले बताए ।
सम्पर्कविहीन रहेका उनलाई कोठामा एक्लै बसिरहेका बेला नियन्त्रणमा लिइएको प्रहरीले जनाएको छ । यसअघि असार २९ गते गंगामायाले अनशन तोड्ने क्रममा आफ्ना जेठा छोराको खोजी गरिदिन आग्रह गरेकी थिइन् ।
गोरखा फुजेल घर भई आफ्ना हजुरबा-आमा भेट्न चितवनको रत्ननगर गएका बेला कृष्णप्रसादको माओवादी कार्यकर्ताले गोली हानी हत्या गरेका थिए ।
सो हत्या प्रकरणमा जाहेरवाला नूरप्रसादलाई चितवन अदालतले उपस्थित हुन आदेश दिएको छ । नूरप्रसादलाई भदौ ४ गते वकपत्र गर्न अदालतले आदेश दिएको हो । यसअघि फुजेलको गाउँकै पिपलको बोटमा म्याद तामेल भएको थियो ।
अदालतले नबुझी नहुने जाहेरवालाकै अनुपस्थितिमा फैसला गर्न लागिएको भन्दै जाहेरवाला पक्षका वकिलले आपत्ति जनाएपछि नूरप्रसादलाई म्याद तामेली गर्न न्यायाधीश कुलप्रसाद शर्माले आदेश गरेका हुन् । अधिकारी प्रकरणको चितवन अदालतमा बहस हुँदैछ ।
प्रतिक्रिया