भूकम्प जाँदा देशभन्दा बाहिर रहेका युवाहरु अहिले भूकम्पले गरेको असर नियाल्न गाउँगाउँ पुगेका छन् ।
भूकम्प प्रत्यक्ष नभोगेका उनीहरु गाउँको दयनीय अवस्था देख्दा झनै दुःखी छन् । भूकम्पबाट भएको क्षतिको सर्वेक्षण गर्न चितवनको काउलेमा खटिएका युवा इन्जिनियरहरुलाई भेट्दा उनीहरुले पढाइ पछिको पहिलो कामको यो अनुभव जिन्दगीकै लागि ठूलो पाठ भएको बताए ।
वैशाख १२ मा विनाशकारी भूकम्प जाँदा राजकुमार निरौला भारतमा थिए । उनले भूकम्पको दृश्य टिभीमा देखे । कैलालीका निरौलालाई भूकम्पको प्रत्यक्ष प्रभाव खासै परेन । तर, अहिले उनी भूकम्पले पारेको प्रभावका विषयमा निकै नजिक भएर काम गर्दैछन् । भारतबाट इन्जिनियरिङमा स्नातक र बेलायतबाट स्नातकोत्तर गरेका निरौला अचेल चितवनको चेपाङ गाउँमा छन् ।
भूकम्पले भत्काएको घरको सर्वेक्षण गर्न तथ्याङ्क विभागको खटनमा उनी गाउँ पुगेका हुन् । चितवनको चेपाङ बहुल पहाडी गाविस काउलेको वडा नं १ र ३ का २६१ घरको उनले सर्वेक्षण गर्नुपर्ने हुन्छ । भूकम्पले भत्केको घरको फोटो खिच्ने, घरमा बस्नेले पाएको सेवा सुविधाको विवरण लिने र तथ्याङ्क विभागमा उसै दिन इन्टरनेटमार्फत पठाउने उनको जिम्मेवारी हो ।
यसैका आधारमा सरकारले घरको क्षतिको अवस्था मूल्याङ्कन गरेर पूनर्निर्माणका लागि रकम उपलब्ध गराउँछ । उनले गर्ने काम नितान्त प्राविधिक विषय हो । तर, गाउँ डुल्दा बेला बेलामा उनी भावुक पनि बन्छन् । ‘काउले गाविसका लागि पाँचजना इन्जिनियर खटेका छौं । सबैको कुरा सुन्दा के लाग्छ भने यो ठाउँ राम्रो छ तर गाउँका मान्छेको दुःख त बयानै गर्न नसकिने खालको छ’ निरौलाले भने ।
चेपाङ गाउँमा भूकम्पभन्दा ठूलो आपत देखेको उनले बताए । ‘यस्तो चिसोमा कुनै छेकबार बिनाको घरमा उनीहरुले गुजारा गरेका छन् । भूकम्पले घर भत्काएर हैन कि उनीहरुले त घरमा बारै नहाल्दा रहेछन्’ निरौलाले भने । भूकम्पले भत्काएको घर बनाउन नसकेर बसेकाहरुलाई सरकारले सहयोग दिने नीति लिएको छ । तर, कहिल्यै राम्रो घर नभएकाहरुको के हुने हो भन्ने चिन्ता उनलाई छ ।
‘काखको बच्चा बितेको भोलि पल्टै बा आमा काम गर्दै गरेको अवस्थामा भेटिन्छन् । सुत्केरीहरु हप्ता दिन नहुँदै काममा भेटिन्छन । यस्तो संसार कल्पनाभन्दा बाहिरको थियो । अरुका लागि भूकम्प दुःख बनेर आयो तर उनीहरु महाभूकम्पभन्दा पनि ठूलो पीडामा रहेछन्’ निरौलाले भने । तर, पीडा ठूलो भए पनि सरकारले सुविधा दिने नियमभित्र उनीहरु पर्दैनन् ।
भूकम्पबाट बढी प्रभावित १६ औ जिल्लापछि १७ औं मा चितवन पर्दछ । चितवनमा घरधुरी सर्वेक्षण र सहयोग वितरणको काम दोस्रो चरणमा परेको थियो । अहिले सर्वेक्षणको काम अन्तिम अन्तिममा पुगेको छ । भारतबाटै बी टेक गरेका र अहिले सर्वेक्षणका लागि काउलेमै खटेका इन्जिनियर डेबिट पौडेल भन्छन् ‘पढाइ सकेर पहिलो काम यही गरियो । पढाइका बेलामा नपाएको समाज र देश बुझ्ने धेरै ज्ञान अहिले पो पाइयो ।’
प्रतिक्रिया