हिमालय खबर  I काठमाडौँ । नेपाली कांग्रेस काठमाडौँ क्षेत्र नं. ३ विपद् व्यवस्थापन समितिको अनुरोधमा नेपाली जनसम्पर्क समिति अमेरिका, नर्थ फेस हेल्पिङ हयाण्ड्स र क्यूनिना नेपालले संयुक्त रुपमा भूकम्पपीडितका लागि टहरा निर्माण अभियान सुरू गरेको छ ।

काठमाडौँ क्षेत्र नं. ३ को विकट गाउँका विभिन्न इलाकाहरुका अति प्रभावितहरुका लागि ४५ वटा टहरा निर्माण सुरु गरिएको जनसम्पर्क अमेरिकाका केन्द्रीय सदस्य हरिबोल भण्डारीले जानकारी दिनुभयो । उहाँले विभिन्न इलाकाका अति प्रभावितमध्ये एकल महिला, विपन्न वर्ग र वास्तविक पीडितहरुको पहिचान गरी टहरा निर्माणमा खटिएको जानकारी दिनुभयो । टहरा निर्माणका लागि ५० जनाभन्दा बढी स्वयम्सेवकहरु खटिएका छन् ।

टोलीमा विपद् व्यपस्थापन समितिका संयोजक एवम् कांग्रेस महासमिति सदस्य गजेन्द्रकुमार लामाले अमेरिकामा रहेर पनि नेपालीहरुको दुःखपीडामा समर्पित भएर सहयोग पु¥याएकोमा नेपाली जनसम्पर्क समिति अमेरिकालाई धन्यवाद ज्ञापन गर्नुभयो ।

जनसम्पर्क समितिका केन्द्रीय सदस्य हरिबोल भण्डारीले छोटो समयको नेपाल बसाईमा पनि भूकम्पपीडित जनताको पुनर्वासका लागि अस्थायी रुपमै भए पनि टहरा निर्माण गर्न सकेकोमा खुसी व्यक्त गर्नुभयो । निकट भविष्यमा बर्खायामलाई ख्याल गर्दै यस प्रकारका थुप्रै टहरा निर्माण गर्ने जनसम्पर्क समितिको योजना रहेको बताउनुभयो ।

समितिका केन्द्रीय उपाध्यक्ष धर्मराज श्रेष्ठले भूकम्प प्रभावित क्षेत्रका जनताहरु आफूहरुको उपस्थितिका कारण उत्साहित भएर पीडा भुल्ने गरेको पाएपछि सहयोगको दायरा अझै बढाउने उद्धेश्य रहेको बतानुभयो । उहाँले यस क्षेत्रका सामुदायिक विद्यालयहरुको पुनर्निर्माणमा आफूले सक्दो सहयोग गर्ने प्रतिबद्धता व्यक्त गर्नुभयो ।

नेपाली जनसम्पर्क समिति अमेरिकाले धादिङ, गोरखालगायतका विभिन्न गाउँहरुमा राहत वितरण गरिसकेको छ । नर्थ फेस हेल्पिङ ह्याण्डस्ले सोलुखुम्बु जिल्लाको विभिन्न ठाउँहरुमा अस्थायी टहराहरु निर्माण गरिसकेको बताउनुभयो ।