काठमाडौँ । नेपाल सरकारले नेपाल प्रहरीको जनपद प्रहरी समूहतर्फ पाँच जना प्रहरी नायव महानिरीक्षक (डिआइजी)लाई अतिरिक्त महानिरीक्षक (एआइजी)मा बढुवा गर्न सिफारिस गरिएको छ ।

शुक्रबार गृह मन्त्रालयमा बसेको बढुवा समितिको बैठकको निर्णयअनुसार उनीहरुलाई बढुवा सिफारिस गरेको हो । समितिले धनुषाको जनकपुर दरबन्दी रहेका वसन्तबहादुर कुँवरलाई एक नम्बरमा एआइजी बढुवा गर्न सिफारिस गरेको छ ।

यस्तै, डिआइजीहरू दाङको तुलसीपुर दरबन्दी रहेका टेकप्रसाद राई, मकवानपुरको हेटौँडा दरबन्दी रहेका दीपक थापा, मोरङको विराटनगर दरबन्दी रहेका श्यामलाल ज्ञवाली र प्रहरी प्रधान कार्यालय, प्रशासन विभाग नक्साल, काठमाडौँ दरबन्दी रहेका किरण बज्राचार्यलाई एआइजीमा बढुवा गर्न सिफारिस गरिएको बढुवा समितिका सदस्य सचिव प्रहरी महानिरीक्षक धिरजप्रताप सिंहले जानकारी दिए ।

यसैबीच, नेपाल अमेरिका पत्रकार संघ (नेजा)का अध्यक्ष एवं हिमालय खबरका प्रबन्ध सम्पादक विकासराज न्यौपानेले एआइजीमा बढुवा सिफारिस भएका वसन्तबहादुर कुँवरलगायत पाँच एआइजीहरुलाई सफल कार्यकालको बधाई तथा शुभकामना व्यक्त गरेका छन् । उनले एआइजीहरुले देशमा सुव्यवस्था र शान्ति कायम गर्न उदाहरणीय भूमिका निर्वाह गर्ने अपेक्षासमेत राखेका छन् ।