काठमाडौँ । नेपालमा पछिल्लो २४ घन्टाभित्र थप ८१८ जनामा कोरोना संक्रमण पुष्टि भएको छ । देशभरका ४० वटा प्रयोगशालामा गरिएको ८ हजार २६ जनाको पिसिआर परीक्षणका क्रममा ८१८ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।
आइतबार नियमित पत्रकार सम्मेलनमा प्रवक्ता डा जागेश्वर गौतमले दिएको जानकारीअनुसार कोरोना संक्रमितको संख्या ३१ हजार ९३५ पुगेको छ । जसमा १३ हजार १५५ जना संक्रमित उपचाररत छन् । पछिल्लो समय कोरोना संक्रमण समुदायस्तरमा फैलिएपछि देशभर ४० भन्दा बढी जिल्लामा निषेधाज्ञा जारी गरिएको छ ।
मन्त्रालयका अनुसार मोरङ, पर्सा, महोत्तरी, रौतहट, सर्लाही र काठमाडौँमा ५०० भन्दा बढी संक्रमित छन् । मुस्ताङ, म्याग्दी र हुम्ला गरी पाँच जिल्लामा संक्रमितको संख्या शून्य छ ।
प्रवक्ता डा जागेश्वर गौतमले पछिल्लो २४ घन्टामा कोरोना सङ्क्रमणबाट थप तीन जनाको मृत्यु भएको बताए । मृत्यु हुनेमा झापाका ५८ वर्षीय एक पुरुष, पर्साको एक ५६ वर्षीया महिला र सर्लाहीको एक ३३ वर्षीया महिला रहेका छन् । नेपालमा कोरोना सङ्क्रमणबाट मृत्यु हुनेको सङ्ख्या १४९ जना पुगेको छ । जसमा ११४ पुरुष र ३७ महिला रहेका छन् ।
काठमाडौँ उपत्यकामा थप १६६ जनामा कोरोना पुष्टि भएको छ । मन्त्रालयका अनुसार काठमाडौँका १२६, लतिपुरका १२ र भक्तपुरका २८ जनामा कोरोना सङ्क्रमण भएको पुष्टि भएको हो । यससँगै उपत्यकाभित्र कोरोना संक्रमित हुनेको संख्या ३२२८ पुगेको छ ।
प्रवक्ता डा गौतमका अनुसार हालसम्म छ लाख ४ हजार ४४ जनाको पिसिआर विधिबाट परीक्षण गरिएको छ भने ३ लाख १२ हजार ४०२ जनाको आरडिटी विधिबाट परीक्षण गरिएको छ । उनका अनुसार हाल ११ हजार ४१४ जना देशभरका क्वारेन्टाइनमा र १३ हजार १५५ जना आइसोलेसनमा रहेका छन् । जसमा संस्थागत आइसोलेसनमा नौ हजार २१२ जना रहेका छन् भने होम आइसोलेसनमा ३९४३ जना छन् । आइसियूमा उपचाररत १३७ जना छन् । बाग्मती प्रदेशका १० जना भेन्टिलेटरमा छन् ।
त्यस्तै, आइतबार एकै दिन कोरोना संक्रमण निको भई २८१ जना डिस्चार्ज भएका छन् । हालसम्म डिस्चार्ज हुनेको संख्या १८ हजार ६३१ पुगेको छ । जुन ५८ प्रतिशत हो ।
प्रतिक्रिया