काठमाडौँ । नेपालमा पछिल्लो २४ घन्टामा १५० जनामा कोरोना भाइरस देखिएको छ । विभिन्न २७ प्रयोगशालामा गरिएको ३९६३ नमुना परीक्षणमा १५० जनामा संक्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ । यससँगै नेपालमा सङ्क्रमितको कुल सङ्ख्या १७ हजार ९९४ पुगेको छ ।

 

मंगलबार सबैभन्दा बढी धनुषामा २९ जनामा सङ्क्रमण पुष्टि भएको छ । काठमाडौँ उपत्यकामा नौ सङ्क्रमित थपिएका छन् । यस्तै, कञ्चनपुरमा २०, महोत्तरीमा १४, दैलेखमा १०, काठमाडौँ र उदयपुरमा आठ/आठ, चितवन र मकवानपुरमा पाँच÷पाँच, बझाङ र डोटीमा चार÷चार, मोरङ, गोरखा, म्याग्दी, स्याङ्जा, बागलुङ, बाँके, सर्लाही, दाङ र कैलालीमा तीन÷तीनजना सङ्क्रमित थपिएका छन् ।

 

यस्तै झापा, इलाम, पर्सा, रामेछाप र सल्यानमा दुई/दुई तथा सप्तरी, काभ्रेपलाञ्चोक, कैलाली, नुवाकोट, ललितपुर, नवलपरासीमा एक÷एक सङ्क्रमित थपिएका छन् । हालसम्म तीन लाख २३ हजार ८३५ नमुना पिसिआर विधिबाट परीक्षण गरिएको छ । क्वारेन्टाइनमा २१ हजार ७०४ र आइसोलेसनमा ५४७७ जना रहेका छन् ।

 

पछिल्लो २४ घन्टामा कोरोना सङ्क्रमण मुक्त भएर ६०९ जना डिस्चार्ज भएको स्वास्थ्य मन्त्रालयका प्रवक्ता डा जागेश्वर गौतमले जानकारी दिए । हालसम्म १२ हजार ४७७ जना कोरोना मुक्त भएर डिस्चार्ज भइसकेका छन् । जुन कुल सङ्क्रमितको ६९.३४ प्रतिशत हो । अहिले पनि मुलुकका विभिन्न अस्पताल तथा आइसोलेसन सेन्टरमा पाँच हजार ४७७ जना सक्रिय सङ्क्रमितको उपचार भइरहेको उनले जानकारी दिए । प्रदेश नं २ को रौतहट तथा सुदूरपश्चिम प्रदेशको कैलाली र बाजुरामा ५०० भन्दा बढी सक्रिय सङ्क्रमित रहेका छन् ।

 

सात जिल्ला कोरोनाको सक्रिय सङ्क्रमित मुक्त भएका छन् । प्रदेश नं १ को भोजपुर, पाँचथर, धनकुटा र सङ्खुवासभा, वाग्मती प्रदेशको रसुवा तथा गण्डकी प्रदेशको मनाङ र मुस्ताङमा कोरोनाको सक्रिय सङ्क्रमित छैनन् । राजधानी काठमाडौँमा हालसम्म ३५९ जनामा संक्रमण पुष्टि भएको छ ।