काठमाडौँ । नेपालमा सोमबार थप ४५१ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयले अद्यावधिक गरेको विवरणअनुसार एकैदिन ४५१ जनामा संक्रमण पुष्टि भएको हो ।

 

जसमा ३५ महिला र ४१६ पुरुष रहेका छन् । शुक्रबार अत्यधिक ४४८ जनामा संक्रमण देखिएको थियो । यस्तै, आइतबार ४२५ जना संक्रमित थपिएका थिए । 

 

मन्त्रालयका प्रवक्ता डा जागेश्वर गौतमका अनुसार सोमबार थपिएकासँगै संक्रमितको संख्या ६२११ पुगेको छ । नेपालमा पहिलोचोटि गत माघ ९ गते चीनको हुवाइ प्रान्तको वुहान सहरबाट नेपाल फर्किएका एक विद्यार्थीमा कोरोना संक्रमण देखिएको थियो ।

 

कुल संक्रमितमध्ये ४७१ महिला र ५ हजार ७४० पुरुष रहेका छन् । आइतबार थप एक जनाको मृत्यु भएसँगै हालसम्म कोरोना संक्रमणबाट मृत्यु हुनेको संख्या १९ पुगेको छ । मृत्यु हुनेमा गुल्मी धुर्कोक गाउँपालिका–४ का ३६ वर्षीय पुरुष रहेका थिए ।  

 

उनका अनुसार हालसम्म कोरोना संक्रमण ७३ जिल्लामा फैलिएको छ । यसैगरी, सोमबार ६७ जना निको भई घर फर्किएका छन् । यससँगै हालसम्म १०४१ जना बिरामी निको भइरहेका छन् । जसमा १०४ महिला र ९३७ पुरुष रहेका छन् । 

 

मन्त्रालयले नियमित पत्रकार सम्मेलनका क्रममा हालसम्म १ लाख ३८ हजार ६८३ जनाको पिसिआर विधिबाट र २ लाख १९ हजार ३३६ जनाको आरडिटी विधिबाट परीक्षण गरिएको छ ।

 

यसैबीच, सोमबारदेखि पोखरामा कोभिड–१९ को पिसिआर मेसिन जडान गरी थप एक प्रयोगशाला स्थापना गरी परीक्षण थालिएको छ ।

 

योसँगै पोखरामा दुई पिसिआर विधिबाट प्रयोगशाला स्थापना गरिएको छ भने देशभर २२ प्रयोगशालाबाट पिसिआर परीक्षण गरिने उनले जानकारी दिए ।  

 

सोमबारसम्म देशभरका क्वारेन्टाइनमा एक लाख ३३ हजार ८२९ जना रहेका छन् भने ५१५१ जना आइसोलेसनमा उपचाररत छन् ।

 

यसैबीच, मन्त्रालयले विभिन्न स्वास्थ्य संस्थासँग कोभिड–१९ का बिरामीको उपचारमा समन्वय र सहजीकरण गर्न मन्त्रालयका वरिष्ठ स्वास्थ्य प्रशासक डा माधवप्रसाद लम्सालको संयोजकत्वमा एक चिकित्सक टोली गठन गरेको प्रवक्ता डा गौतमले जानकारी दिए ।