काठमाडौँ । नेपालमा शनिबार २७३ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयले अद्यावधिक गरेको विवरणअनुसार एकैदिन २७३ जनामा संक्रमण पुष्टि भएको हो । जसमा २४ महिला र ४२४ पुरुष रहेका छन् । शुक्रबार अत्यधिक ४४८ जनामा संक्रमण देखिएको थियो ।
मन्त्रालयका प्रवक्ता डा जागेश्वर गौतमका अनुसार शनिबार थपिएकासँगै संक्रमितको संख्या ५३३५ पुगेको छ । नेपालमा पहिलोचोटि गत माघ ९ गते चीनको हुवाइ प्रान्तको वुहान सहरबाट नेपाल फर्किएका एक विद्यार्थीमा कोरोना संक्रमण देखिएको थियो । कुल संक्रमितमध्ये ३५३ महिला र ४ हजार ७०९ पुरुष रहेका छन् ।
शनिबार थप दुई जनाको मृत्यु भएसँगै हालसम्म कोरोना संक्रमणबाट मृत्यु हुनेको संख्या १८ पुगेको छ । मृत्यु हुनेमा पर्साका २५ वर्षीय पुरुष र निजगढ बाराका पाँच वर्षीय बालकको मृत्यु प्रवक्ता डा गौतमले जानकारी दिए ।
निजगढका बालकको वीरगञ्ज हेल्थ केयर अस्पतालमा उपचारका क्रममा शुक्रबार मृत्यु भएको थियो । निमोनिया भएका ती बालकको आरडिटी र पिसिआर दुवै परीक्षण गर्दा दुवैमा पोजेटिभ रिपोर्ट देखिएको थियो ।
जेठ २८ गते पर्सामा एक पुरुषको शव भेटिएको थियो । नारायणी उपक्षेत्रीय अस्पताल वीरगञ्जमा शव परीक्षणका क्रममा स्वाब संकलन गरी सोही अस्पतालको प्रयोगशालामा गरिएको परीक्षणमा कोरोना संक्रमण पुष्टि भएको डा गौतमले बताए ।
यसैगरी, शनिबार ३५ जना निको भई घर फर्किएका छन् । यससँगै हालसम्म ९१३ जना बिरामी निको भइरहेका छन् । जसमा ९१ महिला र ८२२ पुरुष रहेका छन् ।
मन्त्रालयले नियमित पत्रकार सम्मेलनका क्रममा पछिल्लोपटक ५६६१ जनामा पिसिआर परीक्षण गरिएको जनाएको छ । नेपालमा हालसम्म १ लाख २७ हजार २८८ जनाको पिसिआर विधिबाट र १ लाख ९० हजार ५८२ जनाको आरडिटी विधिबाट परीक्षण गरिएको छ ।
मन्त्रालयले कोरोनाको लक्षण देखिनेका लागि मोवाइल एपमार्फत् विवरण भर्ने व्यवस्था गरेको छ । यस्तै, मन्त्रालयको बेभसाइटमा पनि विवरण भर्न सकिने जनाएको छ । यसका आधारमा शनिबार थप दुईसहित ४९७ जनालाई कोरोनाको आशंकामा रेड जोनमा राखिएको मनत्रालयले अद्यावधिक गरेको विवरणमा उल्लेख छ ।
प्रतिक्रिया