नयाँ दिल्ली । भारतको दिल्ली प्रदेशका मुख्यमन्त्री अरविन्द केजरीवाल अस्वस्थ भएका छन् । उनलाई कोरोना भाइरसको लक्षण देखिएको छ । 

 

ज्वरो आउने, घाँटी र टाउको दुख्नेलगायतका लक्षणहरु देखिएकाले उनलाई कोरोनाको आशंका गरिएको हो । कोरोनाभाइरसको सङ्क्रमण हुँदा देखिने लक्षणसँग मिल्दोजुल्दो लक्षणहरु देखिएपछि उनी सोमबारदेखि आफ्नै निवासमा छुट्टै बस्न थालेका छन् । 

 

उनको मंगलबार कोरोना परीक्षण गरिने तयारी भएको पनि अधिकारीहरुले जानकारी दिएका छन् । आइतबार दिउँसोदेखि उनले आफ्ना सबै बैठक तथा भेटघाटहरुलाई स्थगित गरेका थिए । 

 

आम आद्मी पार्टीका नेतासमेत रहेका ५१ वर्षीय केजरीवाललाई कोरोनाभाइरसका बिरामीलाई देखिनेजस्तै लक्षण देखिएको र मंगलबार परीक्षण गर्ने तयारी भएको पार्टीका अर्का नेता तथा राज्य सभा सदस्य सन्जय सिंहले जानकारी दिए । 

 

“दिल्ली प्रदेशका मुख्यमन्त्री अरविन्द केजरीवाललाई आइतबार दिउँसोदेखि ज्वरो र घाटी दुख्नेलगायतका लक्षणहरु देखिएको छ, चिकित्सकहरुले कसैसँग सम्सर्गमा नरहने गरी अलग्गै बस्न सुझाव दिएका छन्,” सिंहले भनेका छन् । 

 

मुख्यमन्त्री केजरीवाललाई चाँडै निको होस् भनेर आफूले कामना गरेको र कोरोनाभाइरस नलागेको विश्वास व्यक्त गरे । 

 

उनी छुट्टै बस्न थालेर भेटघाट तथा बैठकहरु स्थगित गरे पनि दिल्ली सरकारको काम कारबाहीमा कुनै असर नपर्नेसमेत सिंहले दाबी गरेका छन् । 

 

भारतको केन्द्रीय राजधानीसमेत रहेको दिल्ली प्रदेशमा अहिलेसम्म २८ हजार ९३६ जना सङ्क्रमित भएका छन् भने कोरोनाका कारण दिल्लीमा मात्रै ८१२ जनाको मृत्यु तथ्याङ्क राज्य सरकारको छ । एएनआई