काठमाडौँ । चितवनको भरतपुरस्थित कोभिड–१९ परीक्षण प्रयोगशालामा नमुना परीक्षण गरिएका थप एक जनासहित बिहीबार थप ८७ जनामा कोरोना संक्रमण पुष्टि भएको छ ।  

 

जेठ १० गते भारतको हरिद्वारबाट नेपाल आई नवलपुरको बर्दघाट (सुस्ता) पूर्व देवचुली नगरपालिकाको क्वारेन्टाइनमा रहेका देवचुली १ नवलपुरका वर्ष १९ का युवाको पिसिआर परीक्षणमा कोरोना संक्रमण पुष्टि भएको हो । उनको भरतपुरस्थित कोरोना विशेष अस्थायी अस्पतालको आइसोलेसनमा उपचार भइरहेको छ । 

 

यसैगरी, गण्डकी प्रदेशको स्याङ्जास्थित क्वारेन्टाइनमा रहेका एक महिलासहित तीन जनामा कोरोना संक्रमण देखिएको छ । यसैगरी, कर्णाली प्रदेशमा आठ जना कोरोना संक्रमित थपिएका छन् ।

 

यससँगै कर्णाली प्रदेशमा कोराना संक्रमित हुनेको संख्या ४६ पुगेको छ । सो प्रदेशको सामाजिक विकास मन्त्रालयका अनुसार सुर्खेतको प्रयोगशालामा दैलेखको नारायणपुर नगरपालिकाका आठ जनामा गरिएको परीक्षणमा कोरोना पुष्टि भएको हो ।

 

संक्रमित हुनेहरुमा सो नगरको वडा नं १ का २६ वर्षका युवक, ३ का १९, ३०, ३६ र ४० वर्षका पुरुष, ४ का एक वर्षका बालक र २० वर्षीय युवती र ७ का १७ वर्षीय किशोर रहेका छन् ।

 

यसैगरी, प्रदेश नं २ मा ७६ जनामा कोरोना पुष्टि भएको छ । राष्ट्रिय जनस्वास्थ्य प्रयोगशाला, टेकुमा गरिएको परीक्षणमा ७४ र विपी कोइराला स्वास्थ्य विज्ञान प्रतिष्ठान, धरानमा गरिएको परीक्षणमा दुई जनाको पिसिआर रिपोर्ट पोजेटिभ आएको हो । 

 

संक्रमित हुनेमा सबैभन्दा बढी धनुषाका छन् । धनुषामा २९, महोत्तरीमा १७, सप्तरीमा १४, सर्लाहीमा ७, सिरहामा ६ र रौतहटमा ३ जनाको पिसिआर रिपोर्ट पोजेटिभ आएको हो । 

 

यस्तै, सप्तरीमा थप एक जना प्रहरीमा कोरोना संक्रमण पुष्टि भएको छ । योसँगै सप्तरीमा संक्रमित प्रहरीको संख्या २ पुगेको छ । प्रदेश २ मा कुल संक्रमितको संख्या प्रदेश नं २ मा कोभिड–१९ बाट सङ्क्रमितको सङ्ख्या ४०० जनामा पुगेको छ । 

 

यससँगै नेपालमा कोरोना संक्रमितको संख्या ९९० पुगेको छ । बुधबार ललितपुरमा थप एक जनाको कोरोना संक्रमणबाट मृत्यु भएसँगै हालसम्म कोरोनाबाट ज्यान गुमाउनेको संख्या पाँच पुगेको छ । 

 

स्वास्थ्य तथा जनसंख्या मन्त्रालयका अनुसार हालसम्म १८३ जना निको भई घर फर्किएका छन् । मन्त्रालयले थप संक्रमित र मृत्यु हुनेको संख्या भने दिउँसो १ बजेसम्म अद्यावधिक गरेको छैन । 

 

मन्त्रालयका अनुसार हालसम्म ७० हजार ३०५ जना क्वारेन्टाइनमा रहेका छन् भने ६९९ जना विभिन्न अस्पतालमा आइसोलेसनमा उपचाररत छन् ।