वासिङ्टन । संयुक्त राज्य अमेरिकामा कोरोना भाइरसका कारण बेरोजगार भएका तीन करोड ६० लाख मानिसले बेरोजगार भत्ताका लागि फाराम भरेका छन् । 

 

अमेरिकामा पछिल्लो दुई महिनायता यति धेरै मानिसले बेरोजगार फाराम भरेका हुन् । उनीहरुमध्ये झण्डै तीस लाखले पछिल्लो एक सातामा मात्रै फाराम भरेको अधिकारीहरुले जानकारी दिएका छन् ।

 

बेरोजगार भत्ताको दाबी गर्नेहरुको सङ्ख्या बढ्दै गएपछि सरकारले केही राज्यहरुमा व्यापारिक तथा व्यावसायिक गतिविधिलाई पुनः सञ्चालन गर्न अनुमति दिएको छ । 

 

कोरोना भाइरसको सङ्क्रमण फैलिन थालेपछि अहिले लाखौँ मानिसले अमेरिकामा रोजगारी गुमाएको श्रम विभागले बिहीबार जनाएको छ । 

 

यति धेरै मानिस एकैचोटि रोजगारविहीन भएको र बेरोजगार भत्ता पनि यति धेरै मानिसले एकैपटक मागेको यो दुर्लभ घटना भएको अधिकारीहरुले जनाएका छन् । 

 

बेरोजगार भत्ताका लागि फाराम भरेकामध्ये केही राज्यका कतिपयले भने अहिले पनि त्यो राहत प्राप्त गर्न निकै कठिनाइँ भइरहेको बताएका छन् । एपी