काठमाडौँ । नेपालमा बुधबार थप २४ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयले बुधबार बेलुकी ७ः५० बजे सार्वजनिक गरेको अद्यावधिक विवरणअनुसार नेपालमा कोरोना संक्रमितको संख्या २४३ पुगेको छ । 

 

स्वास्थ्य तथा जनसंख्या मन्त्रालयका सह प्रवक्ता डा समीरकुमार अधिकारीले दिएको जानकारीअनुसार रुपन्देही, कपिलवस्तु, पर्सा र नवलपरासीमा कोरोना संक्रमित भेटिएका हुन् ।

 

जसमा रुपन्देहीका २२ वर्षदेखि ४१ वर्षसम्मका नौ जना पुरुष र ४ देखि २८ वर्षका तीन महिला, कपिलवस्तुका २२ देखि ४२ वर्षका आठ पुरुष, पर्साका ३६ र ७४ वर्षीय पुरुष तथा ३६ वर्षीया एक महिला र नवलपरासीका ३६ वर्षीय एक पुरुषमा संक्रमण भेटिएको हो । डा अधिकारीका अनुसार निजहरुको स्वास्थ्य अवस्था सामान्य रहेको र स्वास्थ्यकर्मीको सम्पर्कमा रहेका छन् । 

 

आजै कपिलवस्तु ५ का २२ वर्षीय पुरुष र बाँकेको नेपालगञ्ज उपमहानगरपालिका–८ का ३६ वर्षीय पुरुषमा संक्रमण देखिएको थियो । 

 

बुधबार रुपन्देही, कपिलवस्तु, पर्सा र नवलपरासीमा गरी २६ जनामा कोरोना भाइरसको संक्रमण भेटिएको छ । योसँगै नेपालमा कोरोना संक्रमितको संख्या २४३ पुगेको छ । जसमा ३५ जना उपचारपश्चात् घर फर्किएका स्वास्थ्य तथा जनसंख्या मन्त्रालयले जनाएको छ ।