मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

ग्लोबल   

बुद्ध जयन्तीमा मोदीले गरे स्वास्थ्यकर्मीहरुको प्रशंसा

बुद्ध जयन्तीमा मोदीले गरे स्वास्थ्यकर्मीहरुको प्रशंसा


नयाँ दिल्ली । भारतीय प्रधानमन्त्री नरेन्द्र मोदीले कोरोना भाइरस (कोभिड–१९) विरुद्धको संघर्षमा लागिरहेका स्वास्थ्यकर्मीहरुको प्रशंसाा गरेका छन् । उनले चिकित्सक, नर्स तथा अस्पतालमा कार्यरत सबै कर्मचारीहरुले यस्तो महामारीको बेलामा पनि उच्च मनोबलका साथ काम गरेको बताएका छन् । 
 
उनले स्वास्थ्यकर्मीहरुले भगवान् गौतम बुद्धले जस्तो सन्देश विश्वलाई नै दिएका पनि बताए । आज भगवान् गौतम बुद्ध जयन्तीका अवसरमा दिएको सन्देशमा उनले सो कुरा बताएका हुन् । 
 
यसअघि पनि उनले कोरोना भाइरसका विरुद्धमा संघर्ष गरिरहेका भारतका स्वास्थ्यकर्मीहरुका साथमा समग्र भारतीय नागरिक र विश्व नै रहेको र उनीहरु एक्लो नभएको बताएका थिए । भारतमा लकडाउन जारी नै रहेको छ भने त्यहाँ दिन प्रतिदिन ठूलो संख्याका संक्रमितहरु थपिँदै गएका छन् । यस्तो अवस्थामा आज गौतमबुद्ध पूर्णिमाको अवसरमा उनले सबै भारतीय जनता स्वास्थ्यकर्मीहरुको साथमा रहेका बताएका हुन् । 
 
उनले ती स्वास्थ्यकर्मीहरुका साथमा सबै भारतीय रहेका बताउँदै भनेका छन्, कोरोना भाइरसविरुद्धको लडाइँमा भारत पनि एक्लो छैन र भार भित्र पनि कोही नागरिक एक्लो छैन । यो महामारीका विरुद्धमा संसार नै साथमा छ । 
 
भगवान् गौतम बुद्ध बलिदानको उच्चतम विन्दुको नाम हो भन्दै आज विश्वले नै उनलाई सेवा र बलिदानका पर्यायका रुपमा हेरिरहेको धारणा पनि राखे । आफ्नो दृढ इच्छाशक्तिका माध्यमबाट गौतम बुद्धले विश्वमा परिवर्तन ल्याएको र विश्वलाई नै शान्तिको मार्गमा हिँडाउन उच्चतम प्रयास गरेको सो सम्बोधनका क्रममा उनले बताएका छन् । 
 
उनले कोभिड १९ का विरुद्धमा लडिरहेका विश्वकै स्वास्थ्यकर्मी तथा सबैको प्रशंसा गरेका छन् । प्रधानमन्त्री मोदीले यो कुनै एक देश वा क्षेत्रको नभएर विश्वकै शत्रुका रुपमा देखापरिरहेको भन्दै यसका विरुद्ध लड्न विश्व नै एकताबद्ध रुपमा लाग्नुपर्नेमा जोड दिए । 
 
उनले यस महामारीका विरुद्धमा लड्न विश्वका सबै देशका नागरिकजस्तै एक अर्ब ३० करोड भारतीय नागरिक पनि एकसाथ रहेको भनाइ राखे । सबै नागरिक घरैमा बसेर महामारीबाट बाँच्न सकिने भन्दै यस महामारीको सबैभन्दा उत्तम उपचारको विधि पनि यही भएको धारणा सो सन्देशमा राखेका छन् । 
 
उनले सो सन्देशमा यतिखेर भारतीय नागरिकले प्रदर्शन गरेको धैर्यता नै विश्वका अरु देशका लागि पनि उदाहरण भएको भन्दै यो महामारीलाई पूर्ण रुपमा नहराउँदासम्म भारत सरकारका निर्णयलाई साथ दिँदै सबैजना घरमै बस्न पनि उनले आग्रह गरे । 
प्रधानमन्त्री मोदीले अहिले अप्ठेरो अवस्थामा भए पनि भोलिका दिनमा छिट्टै नै यो महामारीबाट विश्व नै मुक्त हुने र अध्यारो अवस्थाबाट उज्यालोतर्फ लाग्ने बताए । एएनआई