काठमाडौँ । नेपालमा हालसम्म कोभिड १९ बाट सङ्क्रमितको सङ्ख्या ४५ पुगेको छ । ३५ जनाको उपचार भइरहेको छ भने आज पुष्टि भएका तीन जनाको क्वारेन्टाइनमा रहेकाले उपचारका लागि अस्पताल लैजाने क्रममा रहेको जानकारी दिइएको छ । उपचारमा रहेका सबैको स्थिति सामान्य रहेको छ ।
बीपी कोइराला स्वास्थ्य विज्ञान प्रतिष्ठान धरानमा गरिएको परीक्षणमा आज थप तीन वटा परीक्षण पोजेटिभ आएको स्वास्थ्य तथा जनसङ्ख्या मन्त्रालयका प्रवक्ता डा विकास देवकोटाले जानकारी दिए । उनीहरु तीनै जना पुरुष भएको बताइएको छ ।
कोरोना भाइरसको हालसम्म ४० हजार ४३१ जनाको प्रयोगशाला परीक्षण भएको छ । पिसिआर विधिबाट नौ हजार ११ र र्य।पिड डायग्नेस्टिक टेस्ट प्रविधिबाट परीक्षण गर्नेको सङ्ख्या ३१ हजार ४२० पुगेको प्रवक्ता देवकोटाले जानकारी दिए ।
मन्त्रालयमा आज आयोजित नियमित पत्रकार भेटघाटमा पछिल्लो २४ घण्टामा तीन हजार ७३६ नयाँ प्रयोगशाला परीक्षण भएको जानकारी दिइयो ।
क्वारेन्टाइनमा रहने व्यक्तिको सङ्ख्या हालसम्म आठ हजार ५९५ रहेको छ भने आइसोलेसनमा रहने सम्भावित सङ्क्रमितको सङ्ख्या ९५ जना रहेको छ । हाल कोभिड १९ को रेड जोनमा पर्नेको सङ्ख्या २६९ पुगेको छ ।
मन्त्रालयमा सञ्चालनमा रहेका कलसेन्टरमा गत २४ घन्टामा दुई हजार १४४ कल प्राप्त भएकोमा त्यसको सम्बोधन गरिएको जानकारी दिइयो ।
कोभिड १९ को उपचार गरिरहेकामध्ये निको भएर दुई जना आज मात्र घर फर्किएसँगै उपचार गरेर फर्कनेको सङ्ख्या सात पुगेको छ ।
यसैबीच, मन्त्रालयले कोभिड १९ को जोखिम नियन्त्रणका लागि गरिएको लकडाउनका समयमा ज्येष्ठ नागरिकको स्वास्थ्य र स्याहारमा विशेष ध्यान पु¥याउन आग्रह गरेको छ । नियमित खाने औषधिको उचित व्यवस्था गर्न र स्वास्थ्यमा समस्या देखिएमा स्वास्थ्य संस्थामा पुर्याई दिन पनि मन्त्रालयले सुझाव दिएको छ ।
प्रतिक्रिया