काठमाडौँ । राष्ट्रियसभा सदस्यको बिहीबकार भएको निर्वाचनमा स्थानीय तहतर्फ ९९.१९ प्रतिशत मतदान भएको छ ।
निर्वाचन आयोगका अनुसार, प्रदेशसभा सदस्यतर्फ भने ९९.१५ प्रतिशत मत खसेको छ । राष्ट्रियसभा सदस्यको १८ पदका लागि आज बिहान १०ः०० देखि अपरान्ह् ४ः०० बजेसम्म मतदान भएको थियो ।
मतदान शान्तिपूर्ण र उत्साहजनक रुपमा भएको जनाउँदै आयोगले सम्पूर्ण मतदाता, उम्मेदवार, राजनीतिकर्मी, निर्वाचनमा संलग्न कर्मचारी, सुरक्षाकर्मी, समाजसेवी, सञ्चारकर्मीलगायत आमनागरिकप्रति आभार प्रकट गरेको छ ।
निर्वाचनका लागि मुलुकका सातै प्रदेशका उच्च अदालत रहेका जिल्लामा निर्वाचन अधिकृतको कार्यालय स्थापना गरिएको थियो ।
सुदूरपश्चिममा शारदा भट्ट विजयी
राष्ट्रियसभाको महिला सदस्यमा सुदूरपश्चिम प्रदेशबाट नेकपाका शारदा भट्ट विजयी भएका छन् ।
उनले तीन हजार ७३८ मत प्राप्त गरी विजयी भएका हुन् । उनका निकटतम प्रतिद्वन्द्वी नेपाली काँग्रेसका तुलसी देवकोटाले एक हजार ८५४ मत प्राप्त गरेको मुख्य निर्वाचन अधिकृत विदुर काफ्लेले जानकारी दिए ।
यस्तै, कर्णाली प्रदेशबाट नेकपाका मायाप्रसाद आचार्य र सुमित्रा बिसी विजयी भएका छन् । आचार्यले तीन हजार ६१८ मत प्राप्त गर्दा निकटतम् प्रतिद्वन्द्वी डिल्लीराम पाठकले एक हजार २६ मत प्राप्त गरेको निर्वाचन अधिकृत डा राजेन्द्रकुमार आचार्यले बताए ।
त्यसैगरी बिसीले तीन हजार ६८४ मत प्राप्त गरे भने निकटतम प्रतिद्वन्द्वी गणेशकुमारी बस्नेतले एक हजार २६ मत प्राप्त गरे ।
यो प्रदेशमा रिक्त दुई पदका लागि भएको राष्ट्रियसभा सदस्य निर्वाचनमा कूल १९८ मतदातामध्ये १९५ अर्थात् ९८.४८ प्रतिशतले मतदान गरेका थिए । तीमध्ये एकजना प्रदेशसभा सदस्यको मत बदर भएको निर्वाचन कार्यालय सुर्खेतले जनाएको छ ।
यसैगरी, राष्ट्रियसभाको खुल्लातर्फको सदस्यमा प्रदेश नं २ बाट नेकपा र राष्ट्रिय जनता पार्टीका संयुक्त उम्मेदवार मृगेन्द्रकुमार सिंह निर्वाचित भएका छन् ।
निर्वाचन कार्यालयका अनुसार पाँच हजार ४०० मत प्राप्त गरी उनी निर्वाचित भएका हुन् । उनको निकटतम प्रतिद्वन्द्वी अनिरूद्धकुमार सिंहले चार हजार ५१२ मत प्राप्त गरेका छन् । सिंह संघीय समाजवादी पार्टी र नेपाली काँग्रेसका संयुक्त उम्मेदवार हुन् ।
यसैगरी, राष्ट्रियसभाको महिला सदस्यमा प्रदेश नं २ बाट नेकपा र राष्ट्रिय जनता पार्टीका संयुक्त उम्मेदवार तुलसाकुमारी दाहाल निर्वाचित भएकी छन् ।
निर्वाचन कार्यालयका अनुसार पाँच हजार २०८ मत प्राप्त गरी उनी निर्वाचित भएकी हुन् । उनको निकटतम प्रतिद्वन्द्वी नगिना यादवले चार हजार ७४० मत प्राप्त गरेकी छन् । यादव नेपाली काँग्रेस र संघीय समाजवादी पार्टीका संयुक्त उम्मेदवार हुन् ।
यस्तै, राष्ट्रियसभाको अन्य समूह र महिला सदस्यमा क्रमशः गण्डकी प्रदेशबाट नेकपाका नारायणकाजी श्रेष्ठ र भगवती न्यौपाने निर्वाचित भएका छन् ।
नेकपा प्रवक्ता रहेका श्रेष्ठले तीन हजार ४६२ मत प्राप्त गरी विजयी भएका हुन् । उनको निकटतम प्रतिद्वन्द्वी नेपाली काँग्रेसका सूर्यप्रसाद रेग्मीले दुई हजार २४४ मत प्राप्त गरेका थिए ।
यसैगरी न्यौपाने तीन हजार ३६६ मत प्राप्त गरी विजयी भए भने निकटतम प्रतिद्वन्द्वी काँग्रेसका विमला गौचनले दुई हजार ३४० मत प्राप्त गरिन् । अन्य समूहतर्फ राष्ट्रिय जनमोर्चाका शङ्कर बरालले १९८ मत प्राप्त गरेको निर्वाचन कार्यालयका प्रमुख महेन्द्र सुवेदीले जानकारी दिए । कूल मतदाता २३० मध्ये २२८ जनाले मतदान गरेका थिए ।
राष्ट्रियसभा सदस्यको प्रदेश नं ५ को महिला सदस्यमा नेकपाकी विमला घिमिरे निर्वाचित भएकी छन् । उनी पाँच हजार ७२८ मत ल्याएर विजयी भएकी हुन् । निकटतम प्रतिद्वन्द्वी नेपाली काँग्रेसका गिरिजादेवी न्यौपानेले दुई हजार १०० मत ल्याइन् । महिलाका पाँच मत बदर भएका छन् । अपाङ्गता र खुलाको मतगणना भने घोराही जिल्ला समन्वय समितिको कार्यालयमा जारी छ ।
प्रतिक्रिया